Husi: Jose da Costa
CNRT nudar Partidu Politiko ida iha Timor Leste, nebe daudaun ne'e lidera hela koligasaun nebe bolu AMP (Aliança Maioria Parlamentar) nebe kompostu husi Partidu CNRT, PD, ASDT, PSD & UNDERTIM. Koligasaun ida ne'e lao kuaze atu tama ona tinan 4 iha Governasaun IV Governo Konstitusional nian. Mehi Partidu Fretilin nian atu hatun Governo ida ne'e husi loron ba loron no tempu ba tempu hela nafatin ho mehi no Governo kontinua funsiona, Estabilidade kontinua la'o no Dezenvolvimentu kontinua dudu neneik ba oin, karik lahanesan ho Tsunami nebe Dr. Mari temi iha konsolidasaun ida iha Becora-Fatu Ahi. Estrategia no Propaganda oin-oin mak Fretilin lansa liu husi Autor Dr. Mari Alkatiri nudar Sekjen Fretilin no Membro sira seluk iha Parlamentu Nasional nebe ho objetivo ida deit mak hakarak atu hatun Governo ida ne'e, no fila fali ba poder. Estrategia no Propaganda hirak ne'e mak hanesan tuir mai:
1. Bolu AMP nudar Governo Defakto no Inkonstitusional (Maske sira tauk atu lori ba Tribunal, tamba sei hamoe rasik sira nia an nudar ema sira nebe doutor lei ka Jurista sira)
2. Bolu AMP inkapasidade no fakar osan deit (Maske lahateke ba an no partidu laran rasik katak Fretilin rasik iha kapasidade ka la'e no saida mak halo ona iha sira nia governasaun).
3. Governo ida nebe nakono ho Korupasaun (Maske halo deit akujasaun iha media no deklarasaun politika iha parlamentu no nunka apresenta dadus ida dehan ema nain hira mak halo korupasaun no iha nivel ministeriu ida nebe).
4. Issue Otonomista no Oportunista iha Governo laran (Maske iha Fretilin laran rasik mos ema hanesan Aicha Basarewan sei iha hela. Intensaun husi sira nian mak, liu husi issue ida ne’e, bele hamosu emosaun no persepsaun negativo ba Governo nune’e sira atu fila fali ba poder. Koitadu, povo ida ne’e matenek tebes, ba se mak sira bele tau fiar, no lia los mak iha nebe los. Tan povo ida ne’e hatene hatur tempu no emosaun iha nia fatin).
5. Issue UNTAS (Issue ida nebe la pas ona iha tempu ohin loron, pior a’at liu mak halo fali surat kalen, tesi tun tesi sa’e ema nia opiniaun no inventa tun no inventa sa’e hanesan fali labarik ki’ik sira mak halo politika)
6. Inventa Xanana nia Lian liu husi rekaman sira iha Mobile (Politika ida nebe baratu tebes, no politika labarik nian, tamba laiha etika no maturidade politika. Hahalok hanesan ne’e hatudu deit ita nia frakeza nudar lideransa partidu no indireitamentu hatudu katak ita laiha ona dalan seluk atu influensia eleitores sira. Impresta Xanana nia lian karik dehan “komu sukit labele, entaun selok deit ona)
7. Marsa da Paz (fofoun intensaun husi Marsa da Paz mak atu hatun forsa hotu Partidu Fretilin nian, hodi mai Dili, atu hatudu ba Governo ida ne’e katak povo la aseita aliansa ida ne’e. Maibe komu militantes sira mos lakohi importa ona, entaun habolu fali ona Marsa para Vitoria. Impresta Sr. Vicente Maubocy nia Liafuan karik dehan “Marsa fali ba kotuk”).
8. Abandona Parlamentu (Fofoun kokotek makas dehan atu abandona parlamentu, maibe komu Deputadu sira mos hanoin dehan, Dr. Alkatiri iha osan no nia familia sira mesak ema nebe moris diak deit, se ita abandona agora, ita mak sae rai nafatin. Ho hanoin ida ne’e mak iha hela membro Deputadu sira nia ulun entaun sira lakohi abandona, maske iha instrusaun mai husi Dr. Alkatiri).
9. Eleisaun Antesipada (sorte bo’ot Ramos Horta la mate iha atentadu 11 de Fevereiro, la’e karik kala eleisaun antesipada mosu duni ona, tamba sira nia target mak oinsa para Ramos Horta atu deklara ona Eleisaun Antesipada lalais)
10. Mosaun de Sensura tan kasu Maternus Bere (Fretilin hakarak uza oportunidade ida ne’e, hodi dada emosaun vitima sira nian para nune’e sira bele hetan fali konfiansa. Maibe infelismente hanoin nebe ladun iha rasusino, tan kestaun justisa iha fali kontradisaun ho kestaun interese nasional no ita nia politika de Rekonsiliasaun rasik)
11. Iha konsolidasaun iha Fatin balun iha Setor Leste, Fretilin dehan; Kuandu lakon iha eleiusan Geral 2012, funu sei mosu (koitadu, tempu naruk ema halo funu ita bo’ot toba tiha no laliga rai, tempu ukun a’an, ema atu halo dezenvolvimentu o temi fali funu, hanesan fali ema toba mak mangame iha mehi laran).
Entre strategia & propaganda hirak ne’e, la implika buat ida ba pozisaun Governo ida ne’e. To’o momentu no minutu ida ne’e governo nebe lidera husi Kayrala Xanana Gusmão sei metin no sei metin ba nafatin. Simplesmente atu dehan katak, devia prepara a’an, rekonhese erros sira nebe komete iha tempu hirak ba kotuk, buka atu hadia relasaun ho partidu seluk para kapta fali simpatia eleitores sira nian, hakarak lakon tempu ba halo agitasaun propaganda oin-oin.
Hakerek nain nudar Vendedor Ikan iha Tasi Ibun Lecidere Dili.
Email: namijenu85@gmail.com
Tidak ada komentar:
Posting Komentar