MSS Hahu'u Selu Idozus no Invalidus

Posting Husi : Josefa Parada

---

DILI–Ministeriu Solidariedade Sosial (MSS), liu husi Diresaun Nasional Seguransa Sosial, hahuu halao faze dahuluk pagamentu ba ferik-katuas no invalidus sira iha distritu 13. Pagamentu nee rasik komesa lao ona iha Segunda (13/06).
Xefe Departementu CIT, João Bosco de Jesus Mendonça, haktuir, bazeia ba kalendariu pagamentu idozus no invalidus iha faze primeiru 2011 nee ba Distritu Dili nian, hahuu husi loron (13/06) too (17/06) sei halao pagamentu ba 2,136 benefisiarius husi Sub Distritu Cristo Rei.

Iha loron hanesan (13/06) too (18/06), pagamentu mos halo ba 2,009 benefisiarius husi Sub Distritu Dom Aleixo nian. Tuir fali, iha loron (18/06), pagamentu halao iha Sub Distritu Metinaro ba benefisiarius hamutuk 339. Iha loron (18/06) too (20/06), sei halo pagamentu ba 1,156 benefisiarius husi Sub Distritu Nain Feto. Hafoin iha loron (20/06) too (23/06), sei iha pagamentu ba 1,380 benefisiarius husi Sub Distritu Vera Cruz no ikus liu mak pagamentus ba idozus no invalidus nee sei remata iha Sub Distritu Atauro ho nia benefisiarius 833 iha loron (25/06) too (02/07). Needuni, total benefisiarius husi Distritu Dili nebee mak sei simu osan terseira idade no invalidus hamutuk 7,853 benefisiarius.      
Iha fatin hanesan, Simplicio dos Santos Mendonça, nudar Adminsitradaor Sub Distritu Cristo Rei, Distritu Dili, ba STL iha ninia servisu fatin Becora, Dili Segunda (13/06), informa katak, pagamentu hahuu ona iha Suku Bidau Santana no Suku Metiaut, tuir orariu nebee ninia parte fahe ba suku hitu nebee pertense ba arena Sub Distritu Cristo-Rei nian.
“Razaun hili uluk suku rua nee, tanba sira nia populasaun uitoan deit, no bazeia ba sira nia dadus nebee ami simu uitoan, entaun ami koloka suku rua nee simu hamutuk, depois mak foin tuir fali suku sira nebee mak ninia populasaun barak hanesan Suku Camea, Balibar, Becora Hera no Kuluhun,” dehan Simplicio.
Nia esplika, tuir prosesu nebee mak iha, hatudu katak, pagamentu ba iha terseira idade sira lao diak tanba iha linha koordenasaun entre nivel sub distritu, distrital no nasional nebee servisu hamutuk ho pessoal nebee mak servisu iha sub distritu ho pessoal nebee servisu iha Ministeriu Solidaridade Sosial (MSS), hanesan iha diresaun protesaun labarik nebee sempre halo ligasaun no koordena ho servisu ida nee. Needuni too ohin seidauk iha problema balun nebee rezolve tanba buat hotu lao diak.
“Depois pagamentu nee remata,ami sei fahe ba sesaun rua nebee sesaun ida mak rejista em jeral ba iha veteranus nian, no ida seluk fali mak pagamentu ba iha idozus nian nebee ami tenki fahe buat nee halo diak tanba ami iha nee funsionariu limitadu tebes. Ami sei esforsu makaas hodi nunee pagamentus ba iha terseira idade nian tenki lao nafatin, nunee mos direitus ba veteranus funu nain sira mos tenki lao nafatin hanesan foo nafatin tempu ba sira, para halo rejistu,” informa Administrador Sub Distritu Cristo Rei nee.
Tuir Simplicio, pagamentu ba terseira idade nee sei halao durante loron lima nia laran, hahuu husi Segunda ba too iha Sesta. Maibe depende mos ba iha loron terminasaun, tanba se depois loron nebee termi maibe pagamentus seidauk hotu, entaun sei dada tan (hanaruk tan).
Simplicio hatutan, katuas ferik sira sei simu deit sira nia osan too fulan neen, needuni maske iha informasaun nebee too ba komunidade sira katak, idozu simu sira nia osan iha tinan ida nee remata ona, ida nee la loos.
“Hau hatete ona ba idozus sira katak, imi lalika rona informasaun husi parte nebee deit maibe tenki rona informasaun husi xefi aldeia no xefi suku sira. Kuandu sira mak hatoo informasaun sira nee, entaun loos, tanba sira mai rona informasaun iha Sub Distritu. Hau mos dehan ona ba sira katak, pagamentu idozu ida ohin, nee pagamentu fulan neen nian, nebee iha parte balun iha idozu nebee mak simu fulan 6 nian, balun simu mos la too fulan 6, tanba haree ba iha data rejista ida nee, balun bele simu fulan 2, fulan 5 no fulan 3. Ida nee nia razaun tanba prosesu rejista nee mak determina,” katak Simplicio.
Nia foo ezemplu, see idozu nee rejista iha fulan 6 kotuk ba (Janeiru), entaun nia simu husi Janeiru too Junho. See nia foin mak rejistu iha fulan Fevereiru, Marcu ka Abril, entaun sura kedas husi fulan ida nebaa mai too iha Junho. Tanba nee, osan nebee idozus sira simu, sei la hanesan, maibe ba sira nebee antigun, ida nee sei simu normal husi Janeiru too Junho.
Afonso da Costa, nudar idozu husi Suku Bidau Santa Ana, informa katak, nudar idozu nia senti kontenti tanba governu bele ajuda katuas ferik sira liu husi osan terseira idade ida nee.
Entertantu Albino da Costa, husi Suku Bidau Santa Ana mos dehan,”ami senti kontenti ho haksolok tanba ohin (Segunda-red) ami bele simu osan tuir idozus nian. Estadu hakarak oferese osan ida nee ba ami, no liu husi osan nebee mak iha, hau sei uza ba hau nia presiza lor-loron nian, nunee mos liu husi osan nebee simu, sei uza ba han, selu labarik nia eskola ho trata hatais nian. Entertantu osan nebee mak ami simu ida nee, ami senti la sufisiente ba ami nesesidade maibe estadu oferese ona entaun ami simu deit maski osan ida nee la too ba ami atu halao ami nia presiza lor-loron nian, hanesan ba presiza familia uma laran nian, ida nee ba loron ida ka rua bele sufisiente ba ami nia familia,” tenik Albino.
Tuir obesrvasaun STL, maske pagamentus ba terseira idade nee tuir orarariu hahuu iha tuku 8.00 dadersan, maibe realiade, too ona tuku 10.00, osan seidauk too ba iha katuas-ferik sira nia liman. Katuas ferik sira kontinua hein nafatin atu bele hetan sira nia direitu. lia

Xanana Simu Kompaña Digecel Atu Mai Kompete ho Timor Telekom

Dili-Ita hotu hatene katak Kompaña Timor Telecom Investe ona iha Timor leste hahu iha 2000 liu ba maibe to’o agora iha area rurais sei dauk bele asesu ba redi telekomunikasaun no internet. Kestaun ida ne’e maka governu Timor Leste liu husi Primeiru Ministru Kay Rala Xanana Gusmão hodi simu tan kompaña Digicel husi Irlandia atu bele mai halo investimentu iha area Telekomunikasaun hodi kompete ho Timor Telecom.

Tuir Primeiru Ministru Kay Rala Xanana Gusmão hateten katak Governu Timor Leste diskuti ona lei Liberalizasaun hodi husik kompaña Telekomunikasaun foun hanesan Digecel husi Irlandia no Telekomsel husi Indonesia atu bele mai investe iha Timor Leste hodi kompete ho Timor Telecom.

“Agora dadaun governu Timor Leste iha ona lei Liberalizasaun ne’ebé sei diskuti hela iha  konsellu Ministru.  Konselho Ministru maka sei disidi atu fó posibilidade ba kompaña foun atu bele mai investe iha area telekomonikasaun iha Timor Leste atu nune bele kompete ho Timor Telekom”dehan Xanana hafoin simu Prezidente Digecel Denis O Brain iha Palacio Governu Tersa (09/06/2011)

Iha parte seluk hanesan Prezidente Digicel Denis O Brain informa katak ami prontu atu mai investe ami nia redi Telekomonikasaun iha Timor Leste tuir lei liberalizasaun ne’ebé Governu Timor Leste aprova tia ona.

“Ami mai hasoru malu ho Primeiru Ministru atu koalia tan atu nune ami bele mai investe tan redi telekomonikasaun iha Timor Leste ami informa tan planu potensial balun ba Governu Timor Leste hodi disidi se’e mak atu bele liberaliza merkadu”dehan Denis hafoin hasoru malu ho PM iha Palacio Governu.

Prezidente ne’e mos informa tan katak Digicel hanesan kompaña Telekomunikasaun ne’ebe mos kuinesidu iha Asia no Eropa no ami pronto atu mai investe iha Timor Leste hodi hadia nasaun nia Dezenvolvimentu liu husi Area Telekomunikasaun.

Nia mos hatutan tan katak hatan ba proposta ne’e Primeiru Ministru Xanana Gusmão nia apresia ho ami nia kompaña maibe atu disidi tenke liu husi lei liberalizasaun ne’ebé governu sei diskuti hela iha Konsellu Ministru.

“Ami mos fo agradesementu ba Governu Timor Leste ne’e fo oportunidade ba Digecel hodi fó apoiu ba atividade barak ne’ebé  realiza iha Timor Leste durante ne’e hanesan Jogu Futebol,kurida bisikleta”dehan nia.

http://www.partidocnrt.com/index.php?option=com_content&view=article&id=218:xanana-simu-kompana-digecel-atu-mai-kompete-ho-timor-telekom&catid=32:nasional&Itemid=47

Governu Rekolla Proposta Distritu Nian ba OJE 2012

Dili-Ita hotu hatene katak dala barak ema balun dehan “Governo de Facto” ida ne’e gasta osan barak maibe nunka fo benefisiu ba povu iha rai ida ne’e, maibe ita hare ba realidade Governu ida ne’e iha duni programa ne’ebé hanaran PDD,PDN ho PDL, ida ne’e signifika katak maske neneik maibe Governu ida ne’e bebeik ona.

Primeiru Ministru Kay Rala Xanana Gusmão hateten katak Pakote Dezenvolvimentu Desentralizasaun (PDD) ne’e primeiru no segundu Pakote Dezenvolvimentu Lokal nian, ne’e inportante tebes tamba ho programa ne’e bele ona responde povu nia nesesidade no bele responde povu nia moris ba iha futuru.

“Ita tenke servisu makaas no la’o tuir regra sira no ordem,tamba planu ba dezenvolvimentu liu husi projetu PDD no PDL ne’e ho orsamentu ne’e boot,hau husu ba Administarador Distritu sira hotu atu toma atensaun ba orsamentu ne’e atu bele utiliza didiak atu nune’e bele fo benefisiu ba povu”dehan Xanana hafoin partisipa iha Rekolla Proposta Distritu nian iha Xanana “Sport Center Dili” Segunda (13/06)

Nia mos informa tan katak husu ba administrador sira hotu atu toma atensaun ba kompañia sira hotu atu bele servisu didiak iha komunidade nia let atu servisu ho kualidade atu nune’e povu mos bele sente saida mak Governu halo durante ne’e.

“Hau husu ba Admintrador sira hotu atu toma atensaun ba emprezásriu lokal sira ne’ebé kaer porjetu ne’e tenke ho kualidade la’os atu buka deit osan bo’ot maibe projetu ne’e halo la ho kualidade”dehan Xanana

Iha parte seluk , hanesan Ministru Administrasaun Estatal no Ordenamentu Teritóriu (MAEOT) Arcanjo Leite hateten katak iha primeira vez, governu realiza sorumotu integradu ida iha nivel Sentral hodi diskute no halo apresiasaun ba eleborasaun planu no mos proposta orsamentu husi Distritu nian ba OJE 2012 nian.

“Ohin Ministru Administrasaun Estatal no Ordenamentu Teritóriu no Ministériu Finansa sira, ami organiza sorumutu intregadu ida ne’e iha nivel sentral atu diskute no halo apresiasaun ba eleborasaun Planu dezenvolvimentu nian”dehan Leite.

Nia mos informa tan katak tinan ida ne’e governu iha nia mekanismu foun ida oinsa atu bele fo apresiasaun ba proposta ne’ebé mai husi suku,Sub-Ditritu ne’ebé transmite liu husi Distritu.

Iha parte seluk, hanesan Administrador Distritu Aileu Martinho Matos iha Disrtiru Aileu dehan katak foho mak barak liu neduni molok atu halo Dezenvolvimentu tenke uza mákina Todan/pezada sira ne’e atu bele hatun foho sira ne’e atu nune’e ita bele halo dezenvolviementu.

“Tamba povu iha parte ne’ebá preokupa no hein tebes atu halo dezenvolvimentu konaba Estrada iha sira nia Suku no Aldeia atu nune’e sira bele iha asesu ba iha Estrada atu bele lori sira nia produtu lokal ba iha merkadu”dehan Matos.

http://www.partidocnrt.com/index.php?option=com_content&view=article&id=225:governu-rekolla-proposta-distritu-nian-ba-oje-2012-&catid=32:nasional&Itemid=47

CCI-TL Prontu Hadia Gestaun Negosiante

Posting Husi : Josefa Parada

---

DILI-Camara Komersiu Industria–Timor Leste (CCI-TL) pronto atu hadia gestaun finansa ba negosiante ki’ik bele halao vida negosiu diak hodi hetan osan. Tanba durante negosiante sira laiha kapasidade gestaun finansa loke kios to’o fulan rua tolu taka, tanba laiha gestaun diak hodi halo negosiu.

" Ami ajuda kapasitasaun fo trenamentu kona ba oinsa bele halo gestaun diak, oinsa hasai osan capital, bele kompras, oinsa bele hetan bunga, husi laba ne’e,” dehan Direitur Exekutiva Etalvino Mousaco ba STL iha Kolmera, Dili, Kuarta (8/6).
Tuir nia katak, Emprejariu ki’ik ne’ebe iha Timor Leste barak mak laiha kapasidade gestaun finansa diak, tanba foin kios ida mos taka ona, ne’eduni CCI-TL inisiativa bele tulun hodi bele halao gestaun finansa diak hodi bele to’o objetivu.
Nia haktuir katak, negosiante ki’ik halo negosiu fulan ida rua taka dala ruma osan hasai, hira, maibe oinsa gasta hodi bele hetan funan, halo servisu diak persija aumenta kapasidade, ne’eduni fo trenamentu bele aumeta kapasidade hodi halao gestaun finansa diak.
Modal capital tau ketak, wainhira hetan ona bunga husi laba ohin hasai, uza sosa ne’e. tanba Ami nian funsaun bele tulun emprejariu ki’ik bele hadia gestaun finansa hodi halo negosiu diak atu  hetan benefisiu husi koperativa ne’e.
Nia haktuir katak, durante fo trenamentu 27 pesoas ba empreza hodi bele aumenta kapasidade hodi halao aktividde negosiu diak,nomos 15 pesoas iha distritu Manatuto kona arsenate.
Iha parte seluk Presidente CCI-TL Julio Alfaro mos salenta katak, CCI nia funsaun ajuda emprejariu ki’ik bele aumeta kapasidade hodi halao gestaun servisu finansa diak bele hetan benefisiu hodi koperativa ne’e.
" Ami husu ba emprejariu ki’ik tenki involve an hodi bele hetan trenamentu hodi bele halao servisu gestaun servisu diak,” katak Julio.
Nia salenta katak, uza oras badak, bele halo servisu diak, emprejariu ki’ik kontente tebes ho CCI-TL nia programa durante realize iha distritu sanulu resin tolu.
Nune’e mos Deputado Manuel Tilman mos hatete katak, governu tenki hadia povu nia moris tenki fo trenamentu bele hetan gestaun diak bele halao aktividade negosiu diak.
“Ami husu governu no camara komersiu industria bele tulun empreza ki’ik hakarak halo negosiu iha TL,” katak Tilman.
Alende Laurinda Soares hanesan negosiante ki’ik lamenta katak, emprejariu ki’ik nia kapasidade halo gestaun minimu ne’eduni persija tulun husi CCI-TL. jef

Fulan Dezembru 2011, BDN Komesa Funsiona

Posting Husi : Josefa Parada

---

DILI-Ministru Ekonomi e Dezemvolvimentu (MED) Joao Mendes Goncalves informa katak fulan Dezembru 2011, Banku Dezemvolventu Nasional (BDN) komesa funsiona.

“Ami fo sai ona kriteria lei investementu atu aprova hodi funsiona BDN iha fulan Dezembru 2011,” dehan nia ba STL liu husi telephone selular  iha Distritu Viqueque, Sigunda (13/6).
Tuir nia, atu hari BDN ne’e lori tempu naruk to’o fulan Dezembru tanba persija edefisiu ba banku rasik. Nune’e mos persija   timor oan ne’ebe  hakarak tama asionista.
Nia hatutan katak modal kapital hari BDN ne’e mai husi Governu liu husi MED ho total 10 Miloens Dolar Amerikanu husi Orsamentu Geral Estadu tinan 2010. “ Modal ne’e 51% mai husi governu no modal balun husi asionista emprezariu timor oan nebe hakarak investe nia osan iha BDN,” katak João.
João mos hatete emprezariu timor oan tama ona asionista tanba Premeiru Ministru Kay Rala Xanana Gusmao nomia rasik katak emprezariu nebe kapasidade bele investe modal, tanba BDN loke ba setor pribadu timor oan hotu maibe tenki tuir kriteria no lei.
Tuir nia katak, BDN nia funsaun rua hanesan premeiru ema tama asionista tenki modal Seis mil dolar Amerikanu nomos banku fo kredit ba emprezariu bele halao atividade negosiu.         
Iha parte seluk, Vise Direitur Luta Hamutuk Joaozito Viana mos hatete planu atu hari BDN ne’e kleur ona, maibe seidauk realize. Tanba ne’e nia husu governu loke BDN ba emprezariu timor oan sira bele hetan  vantajen diak husi governu tanba investe osan hodi bele hetan lukru mos ba seitor pribadu.
Nune’e mos Direitur Kompania Green Village Food Li-sion Nheu afirma governu tenki loke lalais BDN ba emprezariu timor oan hotu bele investe sira nia modal kapital.
" Ami husu governu loke BDN ba emprezariu timor oan hotu bele investe nia osan bele fo bantajen ba negosiante ki’ik bele kredit osan hodi  halao atividade negosiu," tenik nia. jef

Rekrutamentu no Formasaun Foun ba Polísia

Sistema foun ida ba Rekrutamentu ajente sira no preparasaun ba Polísia Nasionál Timor-Leste ne’ebé prepara tiha ona liu husi Sekretaria Estadu Seguransa, ne’ebé hetan apoiu husi Guarda Nasionál Republikana (GNR) Portugál.Prosesu ne’e estabelese tiha ona, la’ós de’it halo rekrutamentu nune’e mós iha formasaun. Objetivu boot mak atu halo di’ak liután kapasidade ajente sira nian.
Iha alterasaun ida ne’ebé previstu tiha ona ba rekrutamentu foun mak diminuisaun idade kandidatu sira nian. “idade ne’ebé previstu mak husi tinan 18 to’o tinan 23. Polísia balun ho idade ne’ebé mak avansadu, no hanoin kona-ba ida  ne’e, ami kria ona Lei Reforma, maibé ita presiza rekruta  membru foun, liuliu ba foin sa’e sira, atu ita bele asegura prosesu  ida ne’ebé viável liu ba kontinuidade PNTL nian”, dehan Sekretáriu Estadu Seguransa, Francisco Guterres.
Hakarak mós atu aumenta partisipasaun feto nian iha Polísia Nasionál: “ ami deside atu iha porsentu sanulu resin lima husi feto sira ba PNTL. Ami prepara hela ida ne’e. Iha rekrutamentu foun, iha kandidatu sanulu ne’ebé admitidu, nain tolu mak feto”, garante Francisco Guterres.
Nune’e mós iha parte administrativu sei prepara atu halo mudansa sira, liuliu kona-ba dokumentu sira atu halo inskrisaun. Sekretaria Estadu Seguransa elabora hela formuláriu foun hodi “halo prosesu transparente liután no hodi halakon tiha kualkér posibilidade atu kandidatu ne’e tama tanba hetan rekomendasaun hosi ema ruma”, dehan Sekretáriu Estadu.
Iha prosesu rekrutamentu nian mós,  sei prepara teste oinoin: teste médiku ida,  teste eskritu ida kona-ba kultura jerál, teste psikotékniku no teste físiku. Faze oinoin ba rekrutamentu ida, ne’ebé mak rigurozu tebes, no sei hili kandidatu sira ne’ebé di’ak na’in 250 ba  formasaun ajente foun PNTL nian.
Formasaun bázika ne’e habelar liután. Komesa ona ho fulan tolu de’it, maibé autoridade sira hatene  ona katak ida ne’e la sufisiente tanba ne’e sira aumenta tan ba fulan haat. Nune’e mós tempu ida ne’e kontinua la hatán ba nesesidade aprendizajen no kapasidade ne’ebé ezije hosi profisaun ne’e. “ ho formasaun ida rigoroza liután, ami konsidera katak ami bele halo di’ak liután estrutura no kapasidade ita nia Polísia nian. Ami deside ona atu fó formasaun bázika ba Polísia ho durasaun tinan ida: fulan sia iha treinu báziku hafoin fulan tolu hala’o estájiu, ka iha lian inglés bele hatete on the job training”, esplika Sekretáriu Estadu Seguransa hodi hatutan tan katak prosesu ne’e sei aplika, iha tinan ida ne’e duni ba rekruta foun nain 250

http://timor-leste.gov.tl/?p=5074&lang=tp&n=1

Timor-Leste no Portugál hametin liután Relasaun bilaterál iha área Polítika Enerjétika nian

Sekretáriu Estadu Polítika Enerjétika Timor-Leste nian, Avelino Coelho, no Administradór Eletrisidade Portugál (EDP) internasionál nian, Paulo Miraldo, iha loron 19 fulan Maiu, iha Palásiu Governu, asina Memorandu Entendimentu  ida iha área Polítika Enerjétika entre Timor-Leste no Portugál.
“Tuir ámbitu akordu ne’e, EDP internasionál sei hala’o servisu iha área konsultoria enerjétika, dezenvolvimentu estudu viabilidade no formasaun ba tékniku timor-oan sira iha área enerjia nian”, dehan Sekretáriu Estadu Polítika Enerjétika, Avelino Coelho.
Vizita Administradór EDP Internasionál nian, Paulo Miraldo, no Administradór Fundasaun EDP nian, Sérgio Figueiredo mai Timor Leste atu konfirma interese hosi empreza ne’e atu ajuda Timor ho “know-how” (esperiénsia téknika) ne’ebé mak estabelese iha matéria, dehan Administradór Eletrisidade Portugál Internasionál (EPI) nian. Matéria seluk hosi tema sira ne’ebé mak koa’lia mós mak kona-ba posibilidade dezenvolvimentu nian ba modelu jestaun foun ida ba Eletrisidade Timor-Leste nian ne’ebé sei hahú iha tinan 2012.

http://timor-leste.gov.tl/?p=5070&lang=tp&n=1

MED halo lansamento projetu BOSS no inaugura edifísiu Sentru Dezenvolvimentu Emprezariál no iha Lautem

Ministru Ekonomia no Dezenvolvimentu, João Mendes Gonçalves, loron 6 fulan Maiu, halo lansamentu ba Projetu BOSS (Business Oppurtunities Support Service) no inaugura edifísiu Sentru Dezenvolvimentu Emprezariál (SDE),  iha distritu Lautem.
“Projetu BOSS hetan apoiu finanseiru hosi Ajénsia Internasionál Irish-AID liu hosi ILO no implementasaun hala’o liu hosi MED-IADE no DNDR (Diresaun Nasionál Dezenvolvimentu Rurál). Projetu ne’e atu fó apoiu hodi dezenvolve programa no kapasitasaun emprezariál lokál sira iha distritu Lautem”, hateten Mnistru Ekonomia no Dezenvolvimentu João Mendes Gonçalves.
Aleinde ne’e, ministru ne’e husu mós ba populasaun no emprezáriu lokál hamutuk ho Kámara Komérsiu Indústria Distritu Lautem (CCIDL) atu fó kontribuisaun másimu ba projetu atu nune’e bele hetan susesu,  tanba sei fó benefisiu bo’ot ba populasaun tomak, sei fó servisu ba ema barak no iha futuru bele haburas ekonomia povu no liberta povu hosi terus, susar no ki’ak.

Iha fatin hanesan Xefe Misaun Irish-Aid, Eoghan Walsh hateten, “ha’u sente haksolok tebes partisipa iha Forum Ekonomia iha distritu Lautem, tan ne’e husu ba emprezáriu atu aumenta sira nia valór, la’ós de’it atu sosa no fa’an produtu maibé, Lautem nu’udar Distritu furak no iha fatin turizmu barak ne’ebé bele atrai ema estranjeiru sira, atu halo sai asesível ba turizmu, no haklaken kultura no historia, ka hatudu
ba ema hotu kona-ba riku soin Parke Nasionál Nino Konis Santana nian”.

http://timor-leste.gov.tl/?p=5090&lang=tp&n=1

Xanana: Pobreza Hahú husi Uma Hela Fatin

Dili, Primeiru Ministru Kayrala Xanana Gusmão hateten pobrza ka ki’ak hahú husi uma hela fatin ne’ebé povu hela wainhira la iha kondisaun ne’ebé diak.
“Ita nia povu ne’e nia moris ne’ebé pobre tebes ne’e hahu husi uma, ida ne’e maka ita hare no temi iha ita nia realidade, ita nia kiak hahú husi fatin ita toba”, dehan Xanana ba Chefe Suco nain 224 hafoin implementa projetu Milenium Development Goals (MDG’s) ba kada Aldeia sei hetan uma 5 hahú husi tinan ida ne’e to’o 2015, Iha Centro Konvensaun Merkado Lama Dili tersa ne’e (10/05)
Xanana Hatutan MDG’s ne’e ho Objektivu dezenvolvimentu iha millennium foun hodi Hari’i iha fatin oin-oin hari’i kampu saude, eduksuan,ai- han, hela fatin , hadia buat oin-oin.
“ita halo oituan-oituan  ita redus ida ne’e “,haktuir PM Gusmão.Nia afirma kiak ne’e mai husi  hatais, hahan, medikus, ida ne’e maka pobreza nia hun
“Tan ne’e ita define katak planu urbanizasaun rural ne’e ita halo ba sira ne’ebé  hela iha uma nebe at duni, ne’ebé ita hahú ho uma ida, ho uma ne’ebé mos ba povu sira, ho be,ho ahi no sentina, ida ne’e maka ita hakarak,sei implementa ba  iha aldiea 2.228 ne’e hotu, ne’e  maka tinan ida ne’e ita iha planu atu hala’o projetu MDG’s ,” tenik xefi Governu.
Iha fatin hanesan  Ministru  Administrasaun  Estatal  no Ordenamentu Territoriu Arcangeilo Leite hateten programa MDG’s ka Planu Urbanizasaun Rural ba period u 2011-2015 ne’e ninia impaktu ne’e bo’ot  ba moris komunidade sira iha area rural .
“ programa ne’e nia impaktu bo’ot tebes ba komunidade sira,ita boot sira rona kada aldeia iha uma lima maibe ne’e mos ho kriteriu tamba ne’e aldeia ne’e sei sai hanesan bairu foun ida, hau hanoin programa ne’e atu hala’o maibe sei define se maka sei hetan uma 5 ne’e, dehan Leite.
Entretanto Primeiro Ministru mos sei sente todan kona ba rai hodi hari’I uma ne’e, maibe Nia kontinua sensibiliza chefe do suco sira atu esforsu an hodi kontinua serbisu maka’as ba komunidade sira.
“Kona ba rai chefe suco sira sei hasoru problema bo’ot  ho ida ne’e konsekuensia ne’bé ita tenke hasoru kuandu ita iha vontade diak atu serbisu hodi serbé ita nia povu,”afirma Xanana.
Enkuantu planu urbanizasaun rural ne’e sei halo uma 5 kada aldeia1, sei kompleta ho be mos,solar panel, uma ne’e mos tenke halo iha rai tetuk, ho tipo 36/180 metro ba uma 3 no tipo 50/180 metro ba uma 2.(Celes)

Australia fo Tulun ONG’s

Dili, Governu Australia hamutuk ho Governu Timor-Leste segunda feira ( 09/05/2011) anunsia ofisialmente aplikante susesu ba fundus ETCAS (East Timor Community Assistance Scheme) 2011 nian.
Aplikante hamutuk 25 maka hetan susesu iha tinan ne’e no sei simu fundus hodi ba hala’o dezenvolvimentu iha area oioin mak hanesan edukasaun no treinamentu, promosaun saude baziku, sosiedade sivil, boa governasaun no akontabilidade, no dezenvolvimentu rural mak hanesan; infrastrutura eskala kiik, fornesimentu bee no saneamentu.
Aplikante hirak ne’e sei ba implementa atividaes oin 19 iha distritu 9 (sia), no atividades 6 (neen) sira seluk sei implementa  iha rejiaun laran tomak hodi kobre distritu 13.
Embaixador Australia ba Timor-Leste, Miles Armitage fo parabens ba aplikante sira kona-ba sira nia esforsu iha tinan ne’e, nota katak desde programa ETCAS hahú iha tinan 2000, atividades 550 resin mak hetan ona apoiu husi fundus ne’e.
Australia iha komitmentu maka’as ba Timor-Leste liu husi ninia Programa Asisténsia nebe tinan-tinan oferese ba Governu Timor-Leste nia programa prioridades nasional. Australia apoia dezenvolvimentu iha Timor-Leste desde ukun rasik an, no Australia sei kontinua hametin relasaun ba iha futuru hodi ajuda garantia  seguransa, saúde no prosperiedade ba Timoroan tomak.
Australia fó asisténsia dezenvolvimentu liu husi AusAID, Ajensia Governu Australia ba Dezenvolvimentu Internasionál, maibé mós liu husi Polísia Federal Australia, Programa Koperasaun Defeza no Departamentu sira seluk husi Governu Australia. Governu Australia oferese ona kuaze miliaun 6 resin dolares Australia ba  programa ETCAS .
Programa Asisténsia Australia atinji ona susesu barak iha Timor-Leste. Exemplu, iha area Saude, liu ema nain 1,100 mak hetan ona tratamentu saude matan; iha area Edukasaun, Timoroan liu 270 mak estuda ona iha rai liur; Iha area Treinamentu; ema liu 10,000 mak simu ona treinamentu iha area tekniku no kapasitasaun rekursu umanu; iha area Agrikultura, familia to’os nain hamutuk 12,000 mak bele adapta ona sistema kuda aihan ne’ebe di’ak liu; iha area loke Kampu Servisu, foin sa’e liu 32,000 mak hetan ona oportunidade servisu kurtu-prazu, no iha area Dezenvolvimentu Rural, ema liu 90,000 mak iha ona asesu ba bee mós no saneamentu.( TE )

Nasaun 12 prontu Apoiu Timor Leste iha seitor Dezenvolvimentu

Dili-Konfrensia Nasional ne’ebe loke husi Primeiru Ministru Kay Rala Xanana Gusmao hodi konvida Membru Permanente Connecting and Strengthening Relation Between Local and Foreign Busness (CBMC) husi nasaun sanulu resin rua (12) atu apoiu Timor Leste Liu husi Planu Dezenvolvimentu Nasaional (PDN).

Tuir Primeiru Ministru Kay Rala Xanana Gusmao hateten katak objektivu konvida membru CBMC ne’e atu ajuda Timor Leste liu husi seitor hat hanesan Agrikultura,Mina rai,Gas,no Turismu.

“atu dezenvolve seitor hat ne’e ita tenke presija ajuda husi membru CBMC atu bele ajuda ita iha seitor hat ne’ebe sai perioridade liu ba iha seitor Dezenvolvimentu hanesan Mina rai,Gas,Agrikultura, no turismo”dehan Xanana hafoin halo lansamentu ba konfrensia internsional CBMC iha Centuru Convensoens Dili Kinta Kalan 12/05/11.

Nia mos informa tan katak governu Timor Leste nakloke ba CBMC atu bele fo tulun ba nasaun ida ne’e liu husi seitor hat ne’e atu nune bele ajuda planu Dezenvolviemtnu Nasional iha Timor Leste.

“hau mos fo parabens ba membru CBMC ne’ebe mai partsipa iha konfrensia internasional ida ne’e ne’ebe mai husi nsaun sanulu resin rua hanesan Australia,Japaun,Koreia,Singapura,Brazil,Xina,Malaysia,Macao,Brunei,Taiwan,Korea Selatan inkului mos Timor Leste”dehan Xanana.

Iha parte seluk hanesan Director Ciputra Antonius Tanan husi Indonesia hateten katak ami membru CBMC pronto atu apoiu Timor Leste liu husi seitor ne’ebe deit banhira govenru Timor Leste presiza.

“ami membru CBMC sei sei nafatin atu ajuda Timor Leste iha seitor hat hanesan Agricultura,Mina Rai,Gas, no Turismo atu nune bele ajuda timor leste liu husi dezenvolvimentu Nasional” dehan Antonius iha Hotel Timor Sexta 13/05/11
Aliende ne mos iha nia diskursu, Presidente CBMC Timor Leste Sra. Clarasia, hateten katak  membro CBMC nebe iha Timor Leste iha komitmento hodi hamutuk ho komunidade internasional haburasatu  dezenvolve nasional liu husi investasi iha area ne’ebe importantes.

“ ami membro CBMC Timor Leste iha planu atu promove no haburas dezenvolvimentu nasional liu husi invetasi iha area oin-oin baseia ba ami nia kapasidade nebe iha, no CBMC esforsu an hodi bele lori investor internasional hodi mai investasi iha Timor-Leste, no agora dadaun nasaun 12 mak hamutuk ona ami e sira agora tuir hela konferensia ida ne’e” tenik Sra Clarasia, Diretur Toko Jacinto, 13/05/11.

http://www.partidocnrt.com/component/content/article/28-ekonomia/174-nasaun-12-prontu-apoiu-timor-leste-iha-seitor-dezenvolvimentu.html

Peritos da ASEAN admitem crescimento de dois dígitos nas próximas décadas

Díli, 16 mai (Lusa) -- Peritos da ASEAN admitem que Timor-Leste continue a ter um crescimento de dois dígitos por longo tempo, mas recomendam a melhoria do setor primário, o incremento da produtividade laboral e a identificação e redução de ineficiências.

A informação foi dada hoje pelo Governo timorense, reportando-se à análise, durante uma reunião de peritos da Associação das Nações do Sudeste Asiático, de um documento apresentado pelas autoridades timorenses intitulado "Timor-Leste e a ASEAN em 2030".

Entre os principais tópicos da apresentação, feita durante a última cimeira da ASEAN, em Jacarta, contaram-se os alvos económicos a que Timor-Leste se propõe, apontando para um crescimento económico de dois dígitos para as próximas décadas, mantendo os níveis registados nos últimos quatro anos.

"Com base na hipótese de convergência, através da qual os países pobres e com menos rendimentos irão crescer mais rapidamente do que os países ricos, e com crescimentos elevados, os peritos concordaram que a economia de Timor-Leste, partindo de uma base muito baixa, poderá crescer dois dígitos ao ano durante um longo período", indica um comunicado do Governo timorense sobre a reunião do bloco regional que Timor-Leste pretende integrar.

"Vários países que alcançaram o crescimento de dois dígitos, durante décadas, foram considerados na discussão, incluindo a China, que conseguiu um crescimento médio de 10,2 por cento durante 28 anos (1982-2009); o Japão, que conseguiu um crescimento médio de 10,01 por cento durante duas décadas (1951-1970); e o Botswana, que conseguiu um crescimento médio de 13,5 por cento durante 22 anos (1968-1989)", indica o documento.

De acordo com a mesma fonte, "entre outros conselhos, os peritos recomendaram a incidência no crescimento, incluindo prioridades do setor primário, produtividade laboral e identificação e redução de ineficiências".

MNE partisipa iha Konferénsia Dahaat Nasoens Unidas nian kona-ba País sira ne’ebé Ladún Dezenvolvidu

Delegasaun ida husi Timor-Leste, oras ne’e daudaun, partisipa hela iha Konferénsia dahaat Nasoens Unidas nian kona-ba País hirak ne’ebé Menus Dezenvolvidu, ne’ebé hala’o iha loron 9 to’o 13 fulan Maiu, iha Istambul, iha Turquia. Konferénsia kona-ba País sira ne’ebé Menus Dezenvolvidu ne’e hala’o iha tinan sanulu dala ida no atu halo planu ba kompromisu no programa sira ne’ebé atu fó apoiu ba dezenvolvimentu país hirak ne’e nian, ho forma ida atu hodi atinji nível médiu ba rendimentu.

Ukun na’in sira husi mundu tomak iha hotu sorumutu ne’ebé hala’o iha Istambul, hodi diskute programa asaun foun no hein katak bele alkansa meta sira ne’ebé hakarak katak metade husi grupu husi país hirak ne’ebé menus dezenvolvidu bele hetan progresun to’o iha finál dékada ne’e nian.

Ministru Negósiu Estranjeiru, Zacarias Albano da Costa, ko’alia iha Konferénsia ba País hirak ne’ebé Menus Dezenvolvidu, iha loron 8 fulan Maiu, no nia hola nota katak presiza atu hafoun hikas fali parseria no haforsa liután entre país hirak ne’ebé menus dezenvolvidu no komunidade internasionál, hodi hamenus kiak no alkansa Objetivu Dezenvolvimentu Miléniu nian. Ministru hatutan tan katak, presiza atu harii instituisaun no kapasita rekursu umanu, iha país menus dezenvolvidu nia laran, hanesan fatór fundamentál atu hodi hetan dezenvolvimentu sustentável, inklui mós asisténsia téknika no teknolojia, no mós rekursu finanseiru.

Zacarias da Costa fahe experiénsia Timor-Leste nian, hanesan país joven póz-konflitu, ne’ebé iha objetivu la’os de’it fó boazvindas ba dezenvolvimentu nune’e mós, hetan mekanizmu hotu no programa ne’ebé bele garante katak dezenvolvimentu ne’e hala’o tuir duni prioridade sira nasionál nian. Ministru Negósiu Estranjeiru afirma, mós, katak objetivu no meta sira ne’ebé mak ita hakarak tenke kumpri liu husi asaun no mós ho kompromisu ne’ebé asume husi parseiru dezenvolvimentu sira.

Delegasaun Timor-Leste nian xefia husi Ministru Negósiu Estranjeiru, Zacarias Albano da Costa, konta ho partisipasaun Ministru Turizmu, Komérsiu no Indústria, Gil Alves, ho nia ekipa Misaun Permanente iha Nova Iorque ba Nasoens Unidas, Ekipa husi Ministériu Negósiu Estranjeiru no reprezentante sira husi Kámara Komérsiu.

http://timor-leste.gov.tl/?p=4998&lang=tp&n=1

MTCI Sei Normaliza Folin Fos

Posting Husi : Josefa Parada

DILI-Relasiona ho prekupasaun folin fos ne’ebe agora sa’e maka’as iha area rurais, oras ne’e dadaun Ministeriu Turismu Comerciu no Industria, (MTCI) sei normalize hikas atu responde ba nesesidades loron-loron nian.

‘’Ami planu semana oin mai bele Distribui fos hodi nune’e bele normalize folin fos iha Distritu,”hateten Gestor Interino MTCI, Sancho Ximenes da Silva ba STL Iha Mandarin, kuarta liu ba.    
Sancho afirma hikas, fos ne’ebe maka atu distribui ho objektivu atu bele normaliza  folin iha  Distritu. Tamba ne’e maka  Governu halo intervensaun presu 25kg ba U$15. Karik ema fa’an liu presu katak Sancho, tenki halo kordensaun atu nune’e Governu foti medidas ba asuntu ne’e.
Husi kestaun ne’e, MTCI husu ba povu tomak karik hetan informasaun ne’e iha distritu ou sub-Distritu ne’ebe kontinua fa’an ho folin a’as bele fo hatene ba Governu atu hola medidas ba asuntu ne’e hodi halo intervensaun.
Iha parte seluk, husi membru PN, Deputadu Mateus de Jesus haktuir tan katak, povu barak iha area rurais kestiona kona ba asuntu ne’e.  “Asuntu ne’e importante tamba fos importante ba vida moris ema nian,”dehan Mateus.
Tuir mai Deputadu ne’e sujere ba Governu liu husi MTCI  atu normalize hikas folin fos nian iha teritoriu laran tomak. Tamba ho dalan ida ne’e povu sira ne’ebe mukit bele ona asesu ba fos.
Entertantu Veronica Piedade nudar estudante rekonhese, realidade povu sira iha area rurais susar tebes atu hetan fos, tamba fos ne’ebe iha dala barak folin maka’as hodi fo impaktu bot ba sira. Liu husi dalan ida ne’e, sira husu ba Governu tenke halo intervensaun lalais ba fos nian, nune’e povu sira iha area ne’eba bele asesu fos ho diak.
Kestaun seluk husi, Emilio da Costa nudar Juventude husu liliu ba MTCI atu oinsa direitamente normalize lalais folin fos ne’ebe agora sa’e maka’as iha area rurais. Sela’e negosiantes hirak ne’ebe maka fa’an, kontinua nafatin hasa’e folin tuir sira nia hakarak. vey

SEFOPE aprezenta esbosu saláriu mínimu

Sekretaria Estadu ba Formasaun Profisionál no Empregu (SEFOPE) liu hosi Komisaun Nasionál Saláriu Minímu (KNSM) halo aprezentasaun kona-ba determinasaun saláriu mínimu iha Timor-Leste, iha salaun sorumutu SEFOPE, loron 28, fulan Abril.
Aprezentasaun ida ne’e hanesan pasu positivu ida ba komisaun atu bele haree, rona sujestaun hosi membru sira tomak, atu nune’e KNSM bele halo revizaun ba konseitu saláriu mínimu ne’ebé di’ak no iha ikilíbru ba nesesidade báziku vida umanu  nian, molok atu aprezenta ba Konsellu Ministru no hetan aprovasaun hosi Parlamentu Nasionál” hateten Sekretáriu Estadu Formasaun Profisionál no Empregu, Bendito Freitas.
Bendito Freitas hatutan tan katak haksolok tebes ho rezultadu servisu KNSM nian ne’ebé bazeia ba konstituisaun RDTL artigu 50 n.° 2, kódigu laborál artigu 43 n.° 2 no artigu 131 hosi Organizasaun Internasionál Traballu (OIT).
Iha fatin hanesan tuir Vise-Prezidente KNSM, José da Conceição da Costa hateten katak “bazeia ba rezultadu iha tinan kotuk (12 Abril 2010) konsege halo aprezentasaun ba Konsellu Nasionál Traballu no komisaun relasaun traballu, no  sira fó opiniaun atu hadi’a fila fali item sira ne’e , atu nune’e bele hetan aprovasaun hodi estabelese padraun ba saláriu mínimu ba traballadór sira iha futuru. “KNSM sei esforsu atu kria saláriu mínimu iha tempu badak tuir padraun internasionál”, tenik nia.
KNSM ne’e rasik kompostu hosi Sekretaria Estadu Formasaun Profisionál no Empregu, Ministériu Infra-estrutura, Ministériu Ekonomia no Dezenvolvimentu, Sosiedade Sivil, Emprezáriu no Konsellu Nasionál Servisu nian (KSTL).

http://timor-leste.gov.tl/?p=4991&lang=tp&n=1

PNTL: hosi 2000 to’o 2011

 

Polísia Nasionál Timor-Leste nian (PNTL) kompleta ninia ezisténsia tinan sanulu resin ida iha loron 27 fulan Marsu. Loron ne’e marka ho komemorasaun iha Palásiu Governu nian, iha Díli, no iha importánsia partikulár ba instituisaun nasionál nian ne’e, tanba iha loron ne’e mós mak instutuisaun ne’e simu fali podér ezekutivu seguransa nasionál nian, ne’ebé, husi kedan tinan 2006 Polísia Nasoens Unidas nian (UNPOL) mak kaer. “Aniversáriu iha loron 27 fulan Marsu ne’e, marka eventu rua ne’ebé importante tebes ba ita. Uluk liu aniversáriu ne’e rasik, ne’ebé sai hanesan momentu reflesaun nian, sai hanesan oportunidade ida atu ita halo avaliasaun ba knaar ne’ebé PNTL  hala’o ona. Tuir fali, iha aniversáriu ida ne’e mak halo UNPOL entrega podér ba ita nia Polísia”, afirma Sekretáriu Estadu Seguransa nian, Francisco Guterres, iha entrevista ba programa Rádiu Timor-Leste “Adeus Konflitu, Benvindu Dezenvolvimentu”.

PNTL, ne’ebé UNTAET (Adminitrasaun Tranzitória Timor-Leste nian husi Nasoens Unidas) mak harii iha tinan 2000, buras nafatin no estabelese-an neneik tebes no ladún regulár, tanba ne’e, nia presiza tulun husi rai-li’ur atu garante seguransa iha rai-laran. Iha fulan Dezembru tinan 2002, fulan hitu hafoin restaurasaun independénsia nian,  presiza intervensaun  forsa militár internsionál nian husi Misaun  Nasoens Unidas nian ne’ebe mai iha Timor-Leste atu estabelese fila-fali orden públika.

Iha tinan 2004, PNTL asume ninia  funsaun, sai hanesan forsa polisiál únika ne’ebé sai hanesan responsável ba seguransa rai-laran País ne’e nian. Hafoin liu tiha tinan rua ne’ebé ho estabilidade ida ne’ebé bele dehan dia’k ona, maibé iha fulan Abríl tinan 2006,  krize mosu fila-fali iha nasaun foun ida ne’e. Ukun na’in timor oan sira tenke husu fila-fali tulun husi Organizasaun  Nasoens Unidas nian (ONU). ONU mak asume fali responsabilidade seguransa nian, nune’e PNTL depende de’it ba UNPOL.

Iha tinan 2008, ho situsaun ne’ebé estável ona, hahú halo planu tranferénsia nian atu nune’e transferénsia ne’e bele la’o ho di’ak no metin. Iha tempu ne’ebé operasionál sira simu formasaun, Governu organiza fila-fali Polísia,  hodi halo mós aprovasaun ba Lei-Orgánika foun ida no Rejime Karreira nian ne’ebé  própriu duni ba sira nia karaterístika sira.

Nune’e, iha tinan 2009, PNTL hahú, tuir faze, asume fila-fali garantia seguransa rai-laran País ne’e nian. Unidade dahuluk ne’ebé rekupera ninia funsaun sira mak Komando Distritu Lautén nian. Tuir fali mak Oekuse Ambenu no Manatutu,  no nune’e nafatin to’o Komandu Distritál hotu-hotu país nian.  Transferénsia totál podér ezekutivu seguransa nian husi UNPOL ba PNTL remata iha Dili, iha komemorasaun da-11 Polísia Nasionál nian, iha loron 27 fulan Marsu tinan 2011.

Sekretáriu Estadu Seguransa nian konsidera katak ida ne’e hanesan “dezafiu ne’ebé Polísia sei hasoru, liuliu, iha futuru. Ita hatene katak ita sei iha problema balu ne’ebeé ita presiza rezolve maibé ha’u fiar metin katak PNTL sei halo servisu di’ak liután”.

http://timor-leste.gov.tl/?p=5001&lang=tp&n=1

Ginajiu Maliana Inagura, Mister King Loke Sentru Tebe Bola Iha Maliana

Posting Husi : Josefa Parada

 

FOTO: STL/Oscar Salsinha KOA FITA—Sekretariu Estadu Joventudi ho Desportu (SEJD) Miguel Manetelu, Sesta (13/5 inagura ba iha Ginajiu Munisipal, Maliana, Distritu Bobonaro  no hodi loke mos Sentru tebe bola iha Bobonaro ne’ebe lidera husi Mister King. Seremonia ne’e ho sinal koa pita husi SEJD Miguel Manetelu.

MALIANA—Sekretariu Estadu Joventudi ho Desportu (SEJD), Miguel Manetelu, Sesta (13/5 inagura ba iha Ginajiu Munisipal, Maliana, Distritu Bobonaro  no hodi loke mos Sentru tebe bola iha Bobonaro ne’ebe lidera husi Mister King.

Tuir, SEJD, Miguel Manetelu, husu ba joventudi Bobonaro, atu uza Ginajiu ida ho didiak, atu nune’e bele fo venefisiu komunidade iha Distritu Bobonaro, liliu ba joventudi sira ne’ebe iha talentu desportu nian.
Nia reforsa, bainhira atu uza Ginajiu ida ne’e ba ema kaben, ou ba venefisiu ida ida nian, tenke selu, tanba aktividade ida ne’e sira halo interese ema ida nian.
Nune’e mos nia husu ba iha Adimistrador Distritu Bobonaro atu oinsa bele maneja Ginajiu ida ne’e ho didiak.    Nune’e mos ba iha, Mister King ne’ebe agora dadauk loke Sentru Tebe Bola ida iha Bobonaro.
Adiministrador Distritu Bobonaro, Domingos Martins fo agradese tebes ba iha governu ne’ebe lidera husi Kay Rala Gusmao, no mos esforsu husi Sekretariu Estadu Joventudi no Desportu, tanba ho sira nia esforsu maka ohin loron halo rehalobiltasaun ba Ginajiu Maliana.
Liu husi serimonia ne’ebe inagurasaun ida ne’e, Kompainha Ely Karya, intrega ona xave Ginajiu ba iha governu atu oinsa bele utilize Ginajiu ida ne’e ho didiak.
“Hau mos husu obrigado barak ba iha Kompainha Ely Karya tanba durante ne’e nia esforma hodi bele realiza no rehabilitasaun ba uma ida ne’e,” hatete Martins.
Iha oprtunidade ida ne’e, Mister King, informa mos katak nia sente kontenti tebes atu loke grupu tebe Bola ida iha Bobonaro, atu hodi hili sira ne’ebe maka mak jogu diak bele halo selesaun ba jogu iha rai liur.
“Hau loke Sentru Tebe Bola iha ne’e atu hili deit labele husi idade 12 mai karik atu bele trenu tebes bola, bainhira joga diak hau seli lori ba iha Dili atu halo selesaun bele tuir jogu iha rai liur,” hatete Mister king.
Nia tenik, Sentru Trenamentu Tebe Bolo agora dadauk loke ona iha Distritu tolu hanesan Dili, Lospalos, agora iha Bobonaro, lakleur tan nia sei loke iha Aileu, Suai, ho Same. car

MAEOT sei hala’o diseminasaun kona-ba Programa Dezenvolvimentu Desentralizadu I no II

Ministériu Administrasaun Estatál no Ordenamentu Territóriu, organiza sorumutu ida hodi halo Diseminasaun ba dekretu Lei kona-ba programa Pakote Desenvolvimentu Desentralizadu I no II ba Administradór Distritu, Diretór Distritál hosi Ministériu Edukasaun, Diretór Distritál sira hosi Sekretaria Estadu Obras Públika no Diretór Distritál sira hosi Servisu Bee moos no Saneamentu nian, iha segunda-feira, loron 9 fulan Maiu tinan 2011, salaun STAE,Díli.

“Esperiénsia liubá ne’ebé di’ak no ladi’ak sai nu’udar lisaun ida ba ita hotu atu hakat ba oin. Desizaun KDD (komisaun Dezenvolvimentu Distritál) nian ne’e koletivu, la’os individuál ne’ebé nakonu ho interese pesoál. Maibé importante liu ba KDD atu hala’o nia servisu mak tenke ka’er metin ba prinsipiu sira hanesan partisipasaun, responsabilizasaun, transparénsia no koordesaun servisu nian” hateten Arcângelo Leite iha ninia intervensaun.

Ministru Administrasaun Estatál no Ordenamentu Territóriu ne’e mós hatutan tan katak, Iha tinan 2011, totál projetu PDD I ne’ebé atu hetan implimentasaun iha sub distritu sira hamutuk, projetu 225, ho orsamentu ne’ebé mak sei gasta hamutuk millaun 15. Ba projetu PDD II ne’ebé atu hetan implimentasaun iha Distritu sira, hamutuk projetu  103 ho totál orsamentu ne’ebé sei gasta hamutuk millaun 28. Aleinde ne’e, diferensa entre PDD I no PDD II haree hosi valór orsamentu ba projetu ida-idak, PDD I hahú hosi dólar 150.000 mai kraik no PDD II hahú hosi dólar 151.000 to’o 500.000.

Primeiru-Ministru Kay Rala Xanana Gusmão, iha nia intervensaun husu “ba kompañia sira ne’ebé prenxe rekezitu sira no hetan konfiansa atu ka’er projetu sira, tanke hala’o servisu ho responsabilidade hodi hatudu rezultadu ne’ebé ho kualidade di’ak, atu nune’e bele manán konfiansa liután hosi Governu no komunidade sira ne’ebé sai benefisiáriu ba projetu ne’e. Implementa Projetu sira ne’e hanesan fó kapasitasaun no preparasaun ida ba setór privadu sira, bainhira estabelese munisipiu, sira  iha  ona esperiénsia”.

http://timor-leste.gov.tl/?p=5013&lang=tp&n=1

Implementasaun PDD Distritu Lautem Susesu, 28 Projeitu 100% Remata

Posting Husi : Josefa Parada

LAUTEM–Implementasaun projeitu Pakote Desenvolvimentu Desentralizasaun (PDD) iha Distritu Lautem ezekuta ho diak. 33 projeitu PDD, 28 projeitu 100% remata. Tuir Tim fiskalizasaun husi Komiaun G Parlamentu Nasional (PN), Assuntu Infrastruktura, Ekipamentus Sosiais hare projeitu PDD iha Distritu Lautem susesu.

Iha loron 12 Maiu Fulan ne’e Komisaun G Parlamentu Nasional Asuntu Infrastruktura, Ekipamentus Sosiais halo fiskalizasaun ba Distritu Lautem. Iha oras 03.00 lokraik OTL Komisaun G PN halo sorumutu ho Adjuntu Distritu Lautem no Ekipa Konjuntu Distritu (EKD) ne’e durante oras ida resin (1.30 OTL) ho objetivu atu fahe informasaun ba malu konaba projeitu PDD iha tinan kotuk nian (2010) iha Distritu Lautem no hodi rona mos sobre informasaun diversas nebe hato husi Adjuntu Administrador Lautem ho Ekipa Konjuntu Distritu (EKD) Distritu lautem.
Esplikasaun nebe hato husi Adjuntu Administrador Lautem, Julio Maria de Jesus ho Ekipa Konjuntu Distritu (EKD), Administrador Sub Distritu, Domingos dos Santos Seqeuira, Supervizor Distritu Regional, Gaspar dos Santos, Jestor Obras Publika, Jasinto da Costa ho Supervisor Obras Publika, Olivio Pereira da Concecao sobre projeitu PDD iha Distritu Lautem ne’e halo Vice Presidente Komisaun G PN, Inacio Freitas Moreira ho Sekretariu Komisaun G PN, Arao Noe de Jesus C. Amaral senti haksolok ho esplikasaun sira nebe hato husi Adjuntu Administrador ho EKD Lautem ne’e.
Iha sorumutu ne’e Vice Presidente Komisaun G Parlamentu Nasional, Assuntu Infrastruktura, Ekipamentus Sosiais, Inacio Freitas Moreira hatete katak razaun fiskalizasaun iha Distritu Lautem ne’e hodi hare rezultadu projeitu PDD hanesan infrastruktura pontes, estrada, be’e mos, elektrisidade, edifisiu edukasaun, saude no sel-seluk tan. Tamba tuir Inacio projeitu sira ne’e implementa tena ho orsamentu nebe bo’ot maibe iha akontesementu desenvolve ne’e iha kualidade ka lae tamba iha realidade to’o ikus povu maka senti benefisiu husi projeitu hirak ne’e.
“ Projeitu PDD iha Distritu Lautem tenki hetan esplikasaun konaba rezultadu no informasaun nebe los nebe durante ne’e akontese  konaba rehabilitasaun infrastrutura baziku hanesan pontes, estrada, be’e mos, elektrisidade, edifisiu edukasaun no sel-seluk tan tamba projeitu sira ne’e gasta orsamentu nebe bo’ot tamba ne’e maka ami tenki halo fiskalizasaun konaba projeitu sira ne’e,” komenta Inacio ba STL iha Lautem foin lalais ne’e.
Nune’e mos liafuan hanesan reforsa husi Sekretariu Komisaun G PN, Arao Noe de Jesus C. Amaral katak objetivu fiskalizasaun laos deit iha Distritu Lautem maibe antes ne’e dehan Arao Komisaun G halo tena fiskalizasaun iha Distritu sira seluk hodi hare ezekusaun ezekutivu projeitu PDD 2010 hanesan pontes, estrada, ahi – elektrisidade, be’e mos. Tamba ne’e maka Komisaun presija hetan informasaun husi Adjuntu Administrador Distritu Lautem ho EKD sira konaba fiskalizasaun projeitu PDD.
“ Presija hetan Informasaun husi ita bo’ot sira  (Adjuntu Administardor Distritu lautem ho EKD-Red) konaba fiskalizasaun projeitu PDD iha Distritu Lautem ne’e rasik tamba laos deit iha Distritu Lautem maka ami halo fiskalizasaun maibe antes ne’e mos ami husi Komisaun G halo fiskalizasun iha Distritu balun atu nune’e ami bele hatene saida maka sai hanesan defikuldade iha implementasaun projeitu hirak ne’e tamba ne’e presija fo apoiu ba malu konaba informasaun implementasaun projeitu PDD,” dehan Arao.
Adjuntu Administrador Distritu Lautem Julio Maria de Jesus komenta katak sorumutu ida ne’e entre Komisaun G PN asuntu Infra-struktura no Ekipamentu Sosiais atu informa implementasaun Projeitu PDD tinan kotuk nian nebe susesu ho desvantazen no vantazen to’o iha nebe. Dehan Julio, total projeitu PDD 2010 iha Distritu Lautem hamutuk 33 projeitu, 28 projeitu susesu 100% remata. Maibe projeitu balun normalmente tuir mai sei remata. Alende ida projeitu PDD hot-hotu iha Distritu Lautem 2010 nian remata ho kualidade diak.
“ Total projeitu PDD iha Distritu Lospalos hamutuk 33 projeitu, 28 projeitu 100% remata maibe Maibe projeitu balun normalmente tuir mai sei remata. Alende ida ne’e projeitu PDD hot-hotu iha Distritu Lautem 2010 nian remata ho kualidade diak,” tenik Julio.
Entretantu, tuir Supervisor Obras Publika, Olivio Pereira da Concecao hatuir katak fiskalizasaun husi Komisaun G PN iha Distritu Lospalos iha Suku Bauro nebe Aldeia Nanafoe ne’e hanesan loke estrada foun no ateru ho rai mutin nebe husi Aldeia Sepelata to’o aldeia Sub Sepelata no mos mosu fali iha Somocho maizumenus ho kilometru 7.
“ Ida ne’e maka ami nia servisu duni tamba ami mos hare katak PN liu husi Komisaun G hare ho matan, ida ne’e maka prinsipal liu no ami fo relatoriu katak projeitu sira ne’e li-liu projeitu estrada iha kualidade duni,” hatete Olivio.
Tuir observasaun STL hare katak depois sorumutu, Komisaun G PN Assuntu infrastruktura, ekipamentus Sosiais propois ba Adjuntu Administrador Distritu Lospalos ho Ekipa Konjuntu Distritu sira hodi ba halo fiskalizasaun iha fatin tolu maka hanesan ba hare projeitu edifisiu projeitu infrastruktura eskola Ensino Baziku No I Kuluhun Lospalos, projeitu Sub Sentru oli Pezado iha Aldeia 30 de Augostu Lospalos no projeitu loke loke dalan ka estrada foun no ateru ho rai mutin husi Suku Bauro Aldeia Nanafoe husi Aldeia Sepelata to’o aldeia Sub Sepelata no mos mosu fali iha Somocho maizumenus ho kilometru 7.
Wainhira, Tim fiskalizasaun husi Komisaun G PN halo hela fiskalizasun ba projeitu Sub Sentru Olio Pezado iha Aldeia 30 de Augostu ne’e, trabalhador 3 Damian de Jesus, Jose Alves Cabral ho Camilio Pereira nebe servisu hanesan badain mai hato sira nia sentimentu nebe la diak no satisfetu ho servisu ne’e wainhira servisu maka hanesan servisu hanesan badain laiha luvas, laiha helem inklui husu lisensa ba fila ba konsulta ka diskansa iha tempu meudia tuir informasaun nebe STL hetan katak kompania ne’e koa osan tamba hanesan badain  loron idamana 4.50 cent. Maibe responde ba asuntu ne’e Engeneru Sivil, Djoko Murdoko husi kompania Timor Black Bulding Industry (TBBI) hatete katak  ne’e regras nebe implementa iha servisu ne’e tamba servisu ne’e hodi duni deadline nebe fo husi governu katak iha 28 Novembru tinan ne’e tenki remata maibe konaba asuntu ne’e nia tim sei buka tuir hodi rezolve. jay

MSS Sei Kontinua Ajuda Difisiente

Posting Husi : Josefa Parada

DILI-Ministeriu Solidaridade Sosial (MSS), sei  kontinua  ajuda ekipamentus  ba ema difisiente sira, nomos oinsa atu  halo atendementu ba sira.Tanba sira  iha direitu hanesan ho ema nebe’e fisiku  normal.No sira mos iha direitu atu asesu ba edukasaun. Hateten  Ministra Solidaridade Sosial, Maria Domingas Alves ba STL foin dadaun ne’e.

“Ita  presiza  atu fo apoiu ba ita nia maluk difisiente nebe’e  iha rai ida ne’e, tanba ne’e oras ne’e dadaun ami iha planu ho programa ida atu halo atendementu ba ema difisiente sira, oinsa bele ajuda sira liu husi ekipamentus nebe’e sira presiza.Tanba ami mos  ajuda kursu roda ba sira,”dehan Domingas.
“Ita mos konsege selu bolsa de mae, maibe agora dadaun implementa hela, bolsu de  mae, tanba bolsa de mae ne’e  halao iha tinan tolu nia laran.Hau hanoin bolsa de mae tinan ida ne’e foin mak hahu, nebe’e seidauk tarde, agor
a iha tranzisaun hela,”informa MSS.
Iha fatin seluk, Direitor  Exekutivu   ASSERT  Francisco de Deus Soares,ba STL  iha nia knar fatin, Becora,hateten, sira  sei  loke  sentru rehaplitasaun, intermus   oinsa atu halo atendementu ba  ema difisiente sira.
“Iha tinan kotuk ami  halo atendementu ba  difisiente sira hamutu  1500 resin, maski iha tinan kotuk ne’e  ami halo atendementu fatin limitadu, maibe ami tenta naf teten,”nia haktuir.
Nia mos hateten, hahu iha tinan 2005 to’o agora  total difisiente iha ASERT  hamutuk  n 3000,barak liu iha capital Dili, apoiu ne’e mai husi  Ministeriu Solidaridade Sosial (MSS), ajuda kursu roda  no buat seluk tan,no hetan ajuda husi  CVM  Jerman liu-liu konaba orsamentu.
“Ami  sempre fo treinamentu baa mi nia staf sira hodi hanorin fali difisiente sira,tanba sira mos iha direitu atu asesu iha edukasaun,ami nia planu ba oin husu ba  governu iha komit mentu  bele fo  apoiu buat nebe’e ami presiza,”nia komenta. Sin

Prezensa Ro Pulau Sabu Hakbit Ekonomia Oecusse

Posting Husi : Josefa Parada

AMBENO – Prezensa Ro Pulau Sabu lori impaktu diak ba ekonomia povu Oecusse. Hakbit duni movimento povu hadia sira nia moris. Seitor privadu mos hetan kbit sosa sasan necesidade baziko iha kapital Dili, hodi fa’an iha Oecusse.

Lia hirak nee hato’o husi Agustino Abi nudar negosio sasan iha Oecusse konfesa ba STL foin dadauk nee iha nia servisu fatin merkado Nunbei katak, nia parte senti kontenti teb-tebes ho prezensa Ro Pulau Sabu iha Oecusse, konsege hamoris ona ekonomia povu maski la 100% maibe sirkulasaun sasan necesidade baziko atende ona povu Oecusse.
“Ami povu Oecusse agradese ba governu sentral nia esforsu, liu-liu ba Primeiru Ministru RDTL, Kay Rala Xanana Gusmao, sekretario do estado Obras publiko, Presidente Parlamentu Nasional ho membrus, Director Portu Dili, Sekretario do estado region Autonomia Oecusse, no entidades tomak nebe buka dalan hodi sub-stitui ro Pulau sabu mai Oecusse,”nia hateten.
Nia hateten antes Ro Pulau Sabu halao operasaun ba transporte maritime Dili-Oecusse, sasan necesidade baziko hanesan fos kuda ulun ho todan 30Kg, kada saku ida nia folin US$45.00, maibe agora saku ida ho folin US$23.00, fos Matahari Terbit todan 25Kg ho follin US$18.50, inklui sasan seluk hanesan supermi, terigu, masin midar ninia stok komesa iha ona.
Nune’e mos Gabriel Elu nudar negosio sasan necesidade baziko espera katak, Ro Pulau Sabu tenki halao nafatin operasaun ba transportasaun maritime Dili-Oecusse to’o Ro Nakroma fila mai Timor, sei lae povu Oecusse bele mate.
Nia haktuir tan katak, iha fulan Janeiru liu ba antes ro Pulau Sabu mai Timor, dezemvolvimentu infrastruktura ho ekonomia Oecusse la lao tamba durante nee maski transaksaun illegal nebe trasa husi povu kiik sira iha fronteira, ida nee la atende necesidade povu Oecusse tamba sasan sira nebe tama mai Oecusse limitadu no folin karu tebes.
Francisco da Costa nudar Pasajeirus Ro Pulau Sabu senti kontenti tebes tamba ro nee mai Timor, transportasaun maritime lao diak, sasan mos lori barak maski iha fulan hirak liu ba governu Timor Leste (TL) servisu hamutuk ho Governu Indonesia fasilita povu Oecusse ba Dili liu husi Fronteira, ida nee diak maibe lori sasan sempre limitadu liu entaun povu ninia necesidade moris loron-loron la bele atende ho sufisiente.
“Ami agradese no husu ba governu atu kontinua halo kontratu ho ro ida nee to’o ro Nakroma fila mai Timor, tamba tuir informasaun nebe espaila iha ro laran katak, ro Pulau sabu besik atu remata ona,”nia hateten.
Nee duni povu Oecusse fiar katak antes kontratu nebe governu  TL halo ho Ro Pulau Sabu remata, tenki iha informasaun mos kona ba ro Nakroma para povu kiik iha Oecusse sira nia ekonomia la bele mate hanesan fulan kotuk, povu barak maka hamlaha tamba sirkulasaun aihan iha merkado la iha. jos

Kongresu CNRT, Negosiantes Roda Tolu Raut Tasu

Posting Husi : Josefa Parada

DILI -  Kongresu Nasional Partidu Conselho Nasional Rekonstrusaun Timorense (CNRT) darua  iha salaun Convention Center, Merkadu Lama, Dili, Segunda (2/5), lori lukru boot  ba negosiantes roda tolu sira. 

“Ami sente haksolok kuandu iha loron tolu kongresu ne’e  ami hetan  benefisiu boot. Ne’e hanesan  grasa bo’ot ba ami,”  hatete Feliciano da Silva, ba STL loron hirak liu ba.
Nia hatete, kompara ho loron bain let, merkadu lama  mamuk tebes husi vizitante, maibe, iha loron kongresu  nasional nee, sentru eis merkadu lama nee nakonu ho ema, tanba sira nebe tuir kongresu no sira nebe hakarak akompanha prosesu kongresu nee.
Julieta Barbosa  (negosiantes), hatete  rendementu negosiante sira nian  durante kongresu barak tebes, maibe laos ho mekanismu  hasae presu sasan. “Ami faan ho presu estandar,” konfesa Julieta.
Maria Ximenes nudar negosiante mos hatete, kualidade sasan ne’ebe fa’an iha merkadu lama kuaze iha  folin hanesan. “Sasan ami fa’an mesak hanesan deit, so lukru la hanesan. Tanba balun hetan bo’ot no balun ladun,”hatutan negosiante ne’e. vey

Tinan Nee, Produsaun Hare Maliana Diak

Posting Husi : Josefa Parada

MALIANA-Afeitasaun mudansa klimatika kria estragus barak. Udan tuun demais liu. Estraga luron no ponte, mota estraga hare iha natar, estraga aihan iha to’os, rai monu no dodok iha fatin-fatin. Dezastra bar-barak ne’e kria terus no susar ba populasaun iha teritoriu tomak.

Agrikultor barak mak gagal panen tamba dezastra naturais. I oras nee dadaun kumesa sente ona menus aihan. Aldea balu iha Ainaro kumesa han kumbili, iha Manatuto han akar, aldea balu iha Suku Leo Lima (Sub Distritu Balibo) mos kumesa fai akar hodi han. Bele dehan, fulan hira mai nee, populasaun barak sei infrenta menus aihan.
Maibe iha area tertentu, liliu ba area ne’ebe iha natar luan hanesan Maliana no Uatolari parte tasi ibun, sei ladun hetan susar. Maske ba area to’os, sira la konsege halo to’os tamba udan lafo tempu halo to’os, maibe sira hetan progresu diak ba natar. Prujemplu hanesan, area natar Maliana no Uatolari, tinan ida ne’e sira nia produsaun hare injeral hatudu rezultadu diak. Iha Maliana, Tunubibi no Memu, sira la uza bee husi irigasaun hodi halai natar maibe uza deit udan been. Ho udan been nee, sira utiliza hotu sira nia natar. I hare ne’ebe sira kuda, hatudu duni rezultadu diak. Kompara ho tinan kotuk, tinan ida ne’e, sira sei hetan hare barak. 
Armando Maia de Araujo (agrikultor husi Aldeia Raifun Vila, Suco Raifun), Maliana, ba STL iha Raifun, Quarta (27/4) hateten, tinan ida nee kuazé natar hotu-hotu sira kuda hare, i hotu-hotu hatudu rejultadu diak. “Kom para ho tinan kotuk, tinan ida nee, ami ha’re rejultadu hare diak, i ami fiar bele sufsiente ba ami nia nesesidade,” afirma Maia.
Ho potensia ne’ebe iha, katak Maia, sira espera governu bele ajuda tan hand tractor ba agrikultor natar Maliana. I sira sente katak, hand tractor (kuaze 10 resin) ne’ebe simu husi governu iha 2010 no 2011, seidauk sufsiente ba sira hodi halai natar.
“Defikuldade ba ami traktor.  Kuandu tempo fila rai, traktor ne’ebe ajuda husi governu, ami sente seidauk sufsiente tamba agrikultor ne’ebe inklina a’an ba grupo-grupo, ninia membru barak liu. Tan nee  sempre hadau malu hodi halai natar,” nia dehan.
Paulina de Jesus (agrikultor natar) dehan, ho potensia hare ne’ebe sira iha, sira la sente ona difikuldade hanesan fos tamba sira nia hare hatudu rejultadu diak. “ Agora dadauk ne’e ami nia haree bele sufsiente ona ba ami maibé atú halaó ami nia moris, lahanesan iha tinan uluk nian,” nia esplika.
Tuir nia dala barak sira produs ona sira nia haree ne’ebe sira kuda kuazé natar hectares barak maibé rejultadu ne’ebe sira faan iha merkado ria ne’e mak ladun fo rendimentu ne’ebe diak, tamba sira faan tuir kilo grama.
Nune’e mós, Faustino Dos Santos (Juventude Distritu Bobonaro), hateten katak dadauk ne’e kuandu sira kompara haree iha tinan kotuk ho tinan agora ne’e, tinan ida ne’e liu fali tinan kotuk nian, tamba ne’e mak tuir nia povú liu-liu iha Distritu Bobonaro nian dala ruma sei la infrenta hamlaha.
“ tinan ne’e produsaun haree kompara tinan kotuk bele sufsiente ona tamba ne’e povú sei la infrenta hamlaha, liu-liu iha distritu ida ne’e,” nia aumenta.
Justino Tilman (Juventude), hateten katak nia parte sente kontente tamba iha tinan kotuk dala barak  povú hamlaha tamba mudansa klimatika, maibé tinan ida ne’e povú sente la dun hamlaha tamba produsaun haree tinan ne’e iha rejultadu ne’ebe diak.
Ho ida ne’e, nia hatútan katak, Governu Tinan ne’e Governu bele redus ona sira nia ajudamentu ba povú, liu-liu ba parte mudansa klimatika nian atú nune’e bele haree fali programa sira seluk ne’ebe iha relasaun mós ho povú sira seluk.
Tuir observasaun STL iha terenu hatúdu katak, produsaun haree iha Distritu Bobonaro nian, kuazé natar hectares barak mak utilija ona no iha rejultadu ne’ebe diak, tamba ne’e iha kuazé loron tomak sira sempre halo hotu sira nia tempo iha Natar laran liu-liu ba sira nia haree. Pri

Vise PM Inagura Tore Relojiu Apoiu Husi Korea

Posting Husi : Josefa Parada

DILI-Vise Primeiru Ministru (PM)  Jose Luis Guterres, Tersa (3/5) horseik, espesialmente inagura Tore Relojiu no relojiu liman hamutuk 30.000 ne’ebe ajuda husi Lotte Departement Store Korea. Relojiu liman ne’e  fahe ba estudante   husi Eskola  Primaria, Pre- Sekundaria no Sekundaria iha Timor laran tomak. 

Seremonia inagura Tore Relojiu no relojiu liman ne’e halao iha  Palasio Governu nia oin ho  sinal koa pita husi  Vise  PM Jose Luis Guterres ne’ebe akompania husi  Ministru Edukasaun,  Joáo Cancio Freitas, Ph.D, Sekretariu Estadu Defesa, Julio Tomas Pinto, Embaixador Korea ba Timor Leste,  Seo  Kyoung-suk, Presidenti Lotte Department Store Korea, So Eu Kyoung.
Liu husi seremonia ne’e, Vise  PM  Jose Luis Guterres lori  governu no povu Timor Leste nia naran hato’o agredese ba governu no povu Korea ne’ebe   durante  ne’e fo apoiu  oi-oin ba dezenvolvementu nasaun foun ida ne’e liu husi ninia embaixada iha Timor Leste.
“Korea hanesan nasaun demokrasia ne’ebe uluk terus hanesan ita. Sira luta  iha tinan  barak nia laran to’o hetan independensia. Apoiu ne’ebe  fo ba ita hanesan domin ne’ebe povu Koreanu hato’o ba ita.  Korea ba ita hanesan rai ida estratejiku. Oras ne’e ita nia trabalhadores hamutuk atus lima resin servisu iha  Korea tamba sira nia teknolojia maka’as teb-tebes,” dehan  Jose Luis.
Embaixador  Korea ba Timor Leste,  Seo  Kyoung-suk hatete  Tore relojiu ida ne’e hari hodi komemora  kampanha  halibur  relojiu atu ajuda  Timor Leste  ne’ebe halao husi Lotte Department  Store Korea nian  komesa Outobru 2010 durante fulan ida. “Oras hanesan osan mean ba ita nia moris.  Tamba ne’e, ho ajuda ida ne’e, estudante sira bele halao sira estudu tuir oras,” dehan nia.  
Desenho mak hanesan  sembolu lafaek no kafe  iha bandeira Timor Leste nia laran ne’ebe  ho pilar triangle, no mos  logo Lotte Department Store iha bandeira Korea  no Timor Leste nia klaran  ne’ebe signifika hametin  unidade no relasaun  bilateral iha futuru.  
Alein de ne’e,  relojiu haat ne’ebe monta uza enerjia solar hodi it abele hare oras bainhira deit no husi nebe deit, espera  katak Tore Relojiu ida ne’e  no relojiu liman hamutuk 30.000 ne’e bele dezenvolve  joven Timor Leste sira nia hanoin katak funsaun  relojiu ne’e importante  ba dezenvolvimentu  iha future liu husi  mehi idak-idak nian.
Presidenti  Lotte  Department Store,  So Eu Kyoung  liu husi nia dis kursu hatete  nia kontenti te bes  ho prezensa  Vise  PM  Jose Luis  Guterres no lideransa  Timor Leste seluk  iha seremonia  ne’e.  Entrega relojiu ba estudante sira  signifika katak  ida ne’e bele ha metin  liutan esperansa  estudante  Timor Leste  ba future ne’ebe diak. 
Entretantu,  Ministru  Eduka saun, Joáo Cancio Freitas hatete  monumentu Tore Relojiu ne’e  mai hanesan  kooperasaun diak  entre nasaun rua liu-liu servisu diak  entre Ministru Edukasaun no Embaixada Korea iha Timor Leste.
“Monumentu ida ne’e sira hari’i ho doasaun  husi povu Koreanu atu halibur relojiu ba estudante  sira. Ohin Embaixador  Korea katak  tempu ne’e hanesan osan mean ba estudante. Tempu ne’e laos osan mean deit, maibe  hanesan siensia no matenek.  Imi tenki uza diak-diak imi nia tempu ne’e.  Ba imi tempu mak matenek, tempu buka matenek oi-oin hodi habot imi nia matenek atu ukun rain ida ne’e. Tinan  20-30 mai rain ida ne’e iha imi nia liman atu ukun,” dehan  nia ba estudante sira no profesora-profesores sira ne’ebe asisti iha seremonia  inagura Tore Relojiu ne’e. mik

KM Analiza Primeira Alterasaun ba Lei Fundu Mina-rai Nian

Monday, April 11th, 2011 | Posted by TimorExpose

 

 

Dili - Konsellu Ministru hala’o sorumutu iha Kuarta-feira ne’e(06/04) no analiza Proposta lei kona-ba Primeira Alterasaun ba Lei Fundu Mina-rai nian ne’ebé tuir Lei no 9/2005, loron 3 fulan Agostu (Lei Fundu Mina-rai) determina revizaun ida, iha tinan lima hafoin liu tiha Konstituisaun Fundu Mina-rai nian.

Diploma ne’e atu hodi altera regra no prinsípiu kona-ba investimentu nian, hodi permite flexibilidade boot liu atu diversifika aplikasaun sira, hodi aumenta, iha futuru mai, hetan fila fali rezultadu husi investimentu sira, hodi defini loloos limite espozisaun ba risku, aleinde ida ne’e, lei ne’e klarifika rekizitu sira  ne’eb’e mak atu kumpri husi Governu,  bainhira presiza tebe-tebes atu halo transferénsia ida ba Orsamentu Jerál Estadu nian liu tiha Rendimentu sustentável Estimadu, hodi promove, Iha futuru,  flexibilidade boot ida ba entidade resposável ba jestaun Operasionál direta Fundu nian. Nune’e mós altera ona regra nomeasaun ba membru no kompozisaun ba Komite Asesoría ba Investimentu nian.

Tuir Komunikadu imprensa ne’ebé media ne’e asesu katak dokumentu importante ida ne’ebé hetan konsiderasaun durante revizaun ba Lei ida ne’ebé produz tiha ona liu husi Grupu Traballu internasionál kona-ba” Fundu ba Rikeza Soberana”(Fundu Soberanu):Prinsípiu no Pratika Jerál ne’ebé Aseita, ne’ebé mak dehan mós “Prinsípiu Santiagu nian”.
Prinsípiu hirak ne’e reprezenta esforsu kooperasaun internasionál ida kona-ba identifikasaun ba prátika jestaun nian ne’ebé di’ak liu fundu sira ne’e nian, liuliu, iha área sira temi kona-ba governasaun no polítika investimentu nian, no Governu propoin revizaun ida ne’e ba Lei Fundu Mina-rai nian tuir prinsípiu sira ne’e, atu asegura katak Timor-Leste kontinua sai ezemplu ida kona-ba prátika internasionál ne’ebé di’ak liu iha nivel jestaun  fundu sira hanesan ne’e.

KM mós analiza aprezentasaun ne’e kona-ba Parseria Públiku-Privada (PPP) iha Timor Leste ne’ebé reflete empeñu forte Governu nian ne’ebé konsege halo di’ak liu servisu infra-estrutura liu husi envolvimentu boot ida husi setór privadu hodi halo finansiamentu, konstrusaun no funsionamentu infra-estrutura públika hirak ne’e.
Kriasaun infra-estrutura liu husi akordu PPP nian hetan dezenvolvimentu boot tebe-tebes setór privadu nian, hodi bele kontribui ba kresimentu Produtu Internu Brutu nian (PIB) ba moris naruk Planu Estratéjiku Dezenvolvimentu nian iha tinan 2011 to’o tinan 2030.(TE)

Dekretu Lei KKLN Hetan Analiza iha Konsellu Ministru

Monday, April 11th, 2011 | Posted by TimorExpose

 

Dili - Dekretu-Lei ne’ebé kria Konsellu Kombatente Libertasaun Nasionál (KKLN) analiza ona iha reuniaun Konsellu Ministru kuarta ne’e (06/04).

Tuir Komunikado ne’ebé media ne’e asesu katak diploma ida ne’e prevé estrutura ba Konsellu Kombatente Libertasaun Nasionál, ne’ebé harii iha fulan Fevereiru tinan ida ne’e nian husi Parlamentu Nasionál liu-husi alterasaun artigu 35 husi Estatutu Kombatente Libertasaun Nasionál.

Tuir artigu ida ne’e, Konsellu Kombatente Libertasaun Nasionál, mak órgaun úniku ne’ebé reprezenta interese Kombatente Libertasaun  Nasionál hotu-hotu nian, no “órgaun konsulta Governu nian  ba asuntu hirak ne’ebé iha relasaun ho defeza interese veteranu sira nian nomós ba asuntu sira seluk ne’ebé ko’alia kona-ba kombatente sira Libertasaun Nasionál nian”.

Artigu ne’e define mós, katak: “estrutura Konsellu Kombatente Libertasaun Nasionál nian sei define ho Dekretu-Lei, hafoin halo tiha konsulta ho organizasaun sira ne’ebé reprezenta Kombatente Libertasaun Nasionál sira”.

Entretanto Konsellu Ministru mós analiza dekreto-Lei kona-ba Fó Lisensa ba Atividade Komersiál sira ho objektivu atu estabelese mekanizmu balun atu korrije frakeza hirak ne’ebé mosu iha setór komérsiu nian, no iha tempu hanesan, bele loke dalan atu kria organizasaun ida ne’ebé boot, aproximasaun no konverjénsia ba tipu komérsiu hotu-hotu.

Nune’e, atu garante dixiplina ne’ebé boot liu iha atividade komersiál sira, atu bele  hatán evolusaun ne’ebé hatudu daudauk iha setór ne’e. Atu dehan de’it katak, komérsiu sai hanesan elementu fundamentál ba estrutura ekonomia moderna ida, tanba ninia  influénsia ne’ebé boot iha estruturasaun territoriál no populasionál sosiedade nian, iha kriasaun empreza no empregu sira.(TE)

Beaco Indika Viabel Atu Hari Planta LNG

Saturday, April 16th, 2011 | Posted by TimorExpose

 

Prosesu hasai sampel ba strutura rai iha area Beaco to’o pursentu 90 resin ona, maske análiza laboratoriu seidauk halo maibe iha ona indikasaun forte katak kondisaun rai kuaze hektares 250 ne’e viabel atu hari planta LNG.
Kompañia fo targetu ona atu remata projetu ne’e iha fulan oin mai, maibe obstákulu nebe’e Kompañia sei infrenta mak wainhira halo perfurasaun iha tasi laran. ” Enkuantu laloran tasi boot ami tenke para halo perfurasaun, kestaun ne’e bele impede servisu, maibe ami hakarak remata lalais tiha projetu ne’e. Tenik Vicente Maubusi husi Kompañia Toke Gas nebe mak manan tender ba projetu hasai sampel rai ho folin $ 6,6 Miliaun Dolares Amerikanu.
Nia parte mós halo subkontrak ho  kompañia Earth Geology Service nudar  operadór nebe’e halo ona perfurasaun iha tasi laran no rai maran liu husi métodu komputerizasaun no fura manual nebe’e bele halo perfurasaun klean metru 10 to’o 60, perfurasaun ne’e halo entre distansia metru 300 ba kada pontu perfurasaun ida.
“ oras ne’e ami halo ona pontu perfurasaun liu 16 husi pontu perfurasaun 20 nebe’e ami targetu tiha ona , kondisaun rai nebe’e ami fura ne’e viabel, signifika sei lahasai kustu boot atu hari edifisiu, porto no pipa ba projetu planta LNG,” tenik operadór Yan Yusuf.
Análiza ba sampel rai sei halo iha laboratoriu Bandung Indonesia nebe’e persija tempu to’o tinan, resultadu ne’e sei sai nudar referensia atu halo dezeiñu ba planta LNG nebe ideal.
Aleinde hasai sampel rai Ekipa Taskforce Greater Sunrise mós planeia ona atu realiza estudu Pipeline Root Analysis iha tempu badak hodi asegura oinsa pipa gas iha tasi okos bele dada husi kampu Greater Sunrise ho diak.
“Estudu ne’e atu hare diak liu tan rai iha tasi okos, iha koridor entre distansia radius kilometru ida nebe’e pipeline atu tau ba, ita mós sei hare aspeitu geotekniku, geofizikus no mós foti sampel para análiza geokimikus mós, sefi Ekipa Taskforce Greater Sunrise Francisco Monteiro esplika.
Nia mós esplika konaba oinsa hari fasildade marina nian nebe’e sei suporta aktividade planta LNG nian, tamba ne’e sei persija mós estudu kompletu nebe’e kobre aspeitu oi-oin hanesan batimetria, geofiziku molok dezeiña fasildade mirina.
Projetu planta LNG iha Beaco, refinaria petrokimika iha Betano no supply Base iha Suai nudar komponentu ida nebe’e persija perpara antes wainhira atu dada kadoras husi kampu gas Greater Sunrise mai Timór-Leste, Greater Sunrise oras ne’e sei iha disputa nia laran entre Timór-Leste ho kompaña Woodside ho nia Konsorsiu konaba konseitu desenvolvimentu planta LNG.
Governu  Timór-Leste ho Australia mak sei deside fatin kanalizasaun LNG, Australia durante ne’e fó fiar ba Woodside atu deside  teknikamente no kompañia ne’e sei manten ho opsaun Floating. (Feb)

MED ho CCI - TL servisu hamutuk dezenvolve setór privado

Ses. Abril 15, 10:57h
Ministériu Ekonomia no Dezenvolvimentu liu hosi  Institutu Apoiu Dezenvolvimentu Emprezariál (IADE) segunda-feira, loron 11 fulan Abríl tinan 2011, iha otél Timor Dili, asina nota entendimentu ho Kámara Komérsiu no Indústria Timor Leste (CCI-TL) kona-ba servisu hamutuk hodi dezenvolve setór privadu.
“Governu no CCI-TL hatene katak Empreza Ki'ik (EK) nu’udár mákina ba dezenvolvimentu no kriasaun empregu ne'ebé sustentável. Tanba ne’e Governu CCI-TL iha kompromisu forte atu hasoru dezafiu no difikuldade sira ne'ebé impede hela dezenvolvimentu” hateten Ministru Ekonomia no Dezenvolvimentu, João Mendes Gonçalves.
Ministru ne’e mós hatutan katak intensaun hosi asina nota entendimentu ne’e, atu fó kapasitasaun liu hosi treinamentu ba Kámara Komérsiu no Indústria Timor-Leste nian iha área ne’ebé de’it mak presiza , atu nune’e setór privadu sira bele dezenvolve an sai di’ak liu tan hodi kontribui ba dezenvolvimentu nasionál.
Iha fatin hanesan Prezidente Kámara Komérsiu no Indústria Timor-Leste,  Júlio Alfaro, agradese ba apoiu ne’ebé Governu fó, tanba liu hosi asina nota entendimentu ida ne’e bele fó kapasitasaun no treinamentu ba setór privadu sira hodi bele partisipa iha dezenvolvimentu nasionál País nian.

http://timor-leste.gov.tl/?p=4898&lang=tp&n=1

PNTL Garante Seguransa Ba Eleisaun 2012

Josefa Parada - Sesta, 15 Abril 2011 - Suara Timor Lorosae

DILI—Komandante Jeral Polisia Nasional Timor Leste (PNTL), Komisariu, Longuinhos Monteiro, hatete katak, Polisia prontu atu garante seguransa nasional inklui mos ba iha eleisaun jeral 2012.

“PNTL preparadu desde inisiu nunka revela dehan katak labele, hanesan iha ne’e hau, deskoinese iha hau nia dizionaru, katak labele ne’e laiha, iha hau nia dezionariu ita sempre bele ita sempre prontu bainhira deit tanba ita toman ona ho situasaun hanesan ne’emai ho situasaun agora komando prontu atu asumi responmsalvedade tomak ho hetan apoiu nesisariu mai husi UNPOL, klaru ho sei hetan mos apoiu mai husi forsa sira seluk depende ba iha kordenasaun ho koperasaun servisu mak ita halo ba oin,” hatete Longuinhos Monteiro ba STL iha Kaikoli, Dili, Sesta (15/4).

nune'e Presidente Komisaun B, husi Parlamentu Nasional (PN), ba Asuntu Negosiu Estranjeiru, Defeza, no Seguransa Nasional, Duarte Nunes hatete mos katak polisia nia servisu buka hatene kona ba kazu ne’ebe akontese iha Dili laran. “Ami nudar ema politika hatene halo lei no fo hanoin ba sira atu servisu iha terenu hodi deskobre katak problema nia hun ne’e mai husi ne’ebe,” nia informa.

Iha oprtunidade ida ne’e, Segundu Komandante Jeral PNTL, Komisariu, Afonso de Jesus informa mos katak, atu identifika kazu krimi ne’ebe akontese iha Dili no mos iha Distritu presiza kontribusaun husi komunidade rasik.

“Hau husu nafatin ba iha ba komunidade bainhira iha informasaun atu hato nafatin ba iha Polsia atu bele kaer ema hirak hodi tuir prosesu baze aba lei ne’ebe iha TL,” nia haktuir.Oscar Salsinha.

Konstrusaun Projetu Olio Pezadu, Horta : Prosesu Agora lao ho Kualidade

Josefa Parada - Sesta, 15 Abril 2011 - Suara Timor Lorosae

DILI- Prezidenti Republika Jose Ramos Horta hatete ho ajuda Konsultoris Italianu Prosesu konstrusaun Olio Pezadu, dadaun ne’e lao diak ho kualidade, kompara ho tinan uluk ne’ebe atrajadu tebes.

“Horseik koalia ho PM, Sekretariu Estadu no konsultoris Italianu mos halo briefing mai hau kona ba progresu no dezenvolvimentu projetu ida ne’ebe bo’ot tebes, projetu ne’ebe povu tomak Timor laran ejiji tinan barak nia laran, li-liu Estudante, Joven sira ne’ebe hakarak estuda, iha seitores balun ne’ebe presiza hanesan Industria, Komersiu, buat barak ne’ebe a’at, estraga Komputador, estraga Makina Oi-oin kuandu ita nia Eletrisidade ne’e tu’un sa’e,” hatete PR Horta ba Jornalista hafoin remata Nia Vizita ba Sub-Estasaun EDTL Becora Sesta (15/04).

Premiadu Nobel ba PAZ 1996 ne’e hatete tan katak Pelu menus to’o final tinan ida ne’e, Distritu Dili, Manatutu, Baucau, Lospalos, Ermera, Aileu no Liquisa sei hetan Eletrisidade, depois sei kontinua ba Distritu sira seluk.

Iha fatin hanesan Sekretariu Estadu Eletrisidade Januario Pereira hatete Sub-Estasaun ne’e kona ba konstrusaun Sivil ninian hanesan Uma ho tan kanais sira ita bele dehan 80-90% remta ona, falta instalasaun ekipamentu iha laran, hanesan sasan Elektronika.

“Sub-Estasaun ida ne’e ami bolu hanesan Sub-Estasaun bo’ot, iha ne’ebe bele kontrola ba teritoriu Timor laran tomak, miabe 20 KV ne’ebe sai husi ne’e sei ba Aileu, Tanba ne’emaka iha Sub-Estasaun ne’e sei regula tranfavador rua ne’ebe iha sorin ne’e ida Sat Up ida Sat Down, mais 150 KVA hatun ba 20 KVA maka foin sai Glenu ho Dili,”hatete Nia.

Total orsamentu ne’ebe aloka ba konstrusaun Eletrika Olio Pezadu ne’e hamutuk U$600 Milaun Dolar Amerikanu.

Tuir informasaun ne’ebe STL hetan katak Traballadores timor oan ne’ebe servisu ba konstrusaun ne’e hamutuk ema 500, Konsultan TL nain 10, Konsultan Estranjeiru 40. Kompañia ne’ebe kaer Projetu ne’e maka hanesan, Wartsila ho CNI 22. Kompañia Wartsila toma konta ba Sentral Eletrika no uma, maibe Kompañia CNI 22 konta ba Linha Transmisaun no Sub-Estasaun. Terezinha da Costa

Kazu VPM Jose Luis Guterres AMP Rekonese Ne’e Tendensia Politika, Fretilin Maka Hato’o Keixa

Posting Husi : Josefa Parada
DILI – Bloku Aliansa Maioria Parlamentar (AMP) husi CNRT no PD hare kazu Vice Primeru Ministru (VPM) Jose Luis Guterres hanesan praktika iha aktus ida ho intensaun politiku ka politizasaun ba aktus ida ne’e.

Tanba ne’e  tuir regras Parlamentu liu husi deputadus sira, husu ba Tribunal Rekursu (TR) atu halo tuir kopetensia nebe iha hodi hare lalaok MP ninian. Maibe husi Fretilin nian hanoin katak atu kombante korupsaun tenki ba kadeia ne’e komitmentu ema hotu nian inklui AMP ho hetan indisiu sira hanesan ne’e bankada Fretilin maka halo keixa.
Tuir Deputadu Aderito Hugo da Costa husi bankada CNRT, hatete ne’e regras rezulusaun nebe hasai no deputadu sira uja tipo rezulusaun para atu ekspresta sira nia lamentasoens tanba hare praktika aktus-aktus balun iha MP hatudu sinal politizasaun. Li-liu relasaun kazu prosesamentu ba VPM Jose Luis Guterres nian, nebe faktus hatudu katak Aderito, VPM Jose Luis Guterres ne’e tuir lolos nia mesak maibe iha autor sel-seluk nebe faktus ho evedensia hatudu mo-mos katak autor sira ne’e tuir lolos tenki tama hotu iha prosesamentu ne’e.
“ Aktor sira ne’e laiha prosesamentu  MP abandona tiha deit la  tau konsederasaun avansa liu fali Senhor Jose Luis Guterres. Ida ne’e maka ami hare hanesan praktika iha aktus ida ke ho intensaun politiku ka politizasaun ba aktus ida ne’e. Tanba ne’e  maka tuir regras mos Parlamentu liu husi deputadus sira husu ba Tribunal Rekursu (TR) atu halo tuir nia kopetensia iha atu hare lalaok MP ninian,” hatete Aderito ba STL iha PN, Kinta (6/4).
Liafuan hanesan reforsa husi Deputadu Adriano do Nascimento husi PD komenta katak depois investigasaun ema nebe akuza dadus sira ne’e kompletu sei lori ba tribunal instrusaun halo fali julgamentu sei nia ne’e forte maka lori ba tribunal hodi julga mais ne’e hasai ona suspende no nia imunidade. Maibe katak Adriano iha ne’e laiha konstituisaun husi PGR dereitamente ba tribunal.
“ Hau hakarak hatete katak tanba sa mak ami tau iha rezolusaun suspensaun imparsial katak loron ida ba hatn ih Tribunal no remata julgamentu fila mai halao funsionamentu hanesan VPM nafatin. Tanba sa, tanba TL sidauk iha lei konaba suspensaun, TL sidauk iha lei konaba atu hasai imunidade maske iha konstituisaun hatete,” dehan Adriano.
Tuir Deputadu Natalino dos Santos hatete katak tribunal justisa atu halo inkeritu ho investigasaun ba PGR relasiona ho kazu VPM Jose Luis Guterres katak tuir sira nia hare injustisa bo’ot nebe PGR halo ne’e lolos autor-autor prinsipal sira nebe asina kontrato no ema sira nebe selu osan katak ema sira ne’e disklui hasai tiha nudar akuzador no ema nebe hare la lolos hanesan arguidu responsabilidade ba asuntu ne’e maka sai fali arguidu.
” PN hakarak husu rezolusaun ida ne’e para prevene la bele ba oin justisa ne’e la bele sai fali justisa ne’e hanesan palku politika para atu politika maibe instituisaun PGR hanesan instituisaun ida nebe atu garanti justisa no defende dereitu estadu ida nian tuir konstituisaun fo ba sira,” hatete Natalino.
Entretantu, tuir Xefi bankada Fretilin Aniceto Guterres komenta katak  iha momentu ne’e PGR sidauk Ana Pessoa ida, prokurador investiga tiha kezu ne’e tanba iha evedensia forti entaun provudor inkaminha ba Ministeriu Publiku, Ministeriu Publiku prosesa.
AMP sira mos sei halo karta ba PR katak PGR Ana Pessoa Pinto tenki rejigna a’an katak Aniceto ne’e laiha problema maibe uluk sira maka husu Ana Pessoa ne’e sai PGR laos fretilin. Jame do Rosario

Hari’i Antena TT Iha Suco Parlamentu

Posting Husi : Josefa Parada
LAUTEM- Compania Telekomunikasaun ne’ebe investe iha Timor Leste liu husi Rede telekomunikasaun nian ne’e, dadaun ne’e loke ona liras ba Distritu hotu, liu-liu teritoriu timor laran tomak, tamba monta ona antenna iha fatin-fatin hodi nune’e ema hotu bele hetan rede telekomunikasaun atu nune’e bele asesu ba informasaun tantu husi telefone no seluk tan.

Tamba ne’e iha Suco Parlamentu, Sub-Distritu Lautem, Compania Timor Telekom hari’i dadauk antena telekom ida iha Suco Parlamentu, atu nune’e bele aumenta rede telefone hodi nune’e ema hotu bele asesu telefone ho diak.
Tuir Xefi Suco Parlamentu, Angelo Galvao Silva, ba STL iha nia fatin foin lalais ne’e hateten katak, durate ne’e iha Suco Parlamentu, liu-liu iha Aldeia hirak ne’ebe iha Suco Parlamentu nia laran balun seidauk bele hetan rede diak iha telemovel tamba ne’e espera katak ho prejensa antenna telekomunikasaun ida ne’e bele akapta hotu aldeia hirak ne’ebe iha Suco Parlamentu nia laran.
“ Ida ne’e tamba iha area balun ne’ebe ladun asesu rede telemovel, tamba ne’e espera katak ho antenna ida ne’e bele ona akapta area hotu iha Suco ida ne’e nia laran,” nia realsa.
Tamba ne’e nia parte fo agradesimentu ba Compania Timor Telecom ne’ebe hari’i dadauk antenna iha sira nia fatin ne’e, no espera katak bele halo mudansa ba sira nia Suco refere, nomós bele fo rede ne’ebe diak ba Komunidade iha area refere.
Nune’e mós, Inacio Monteiro, iha nia esplkasaun hateten katak, durante ne’e sira nia Aldeia ladun asesu rede telefone ho diak, tamba ne’e ho antenna ne’ebe hari’i dadauk ne’e bele ona fo rede ne’ebe diak ba komunidade sira ne’ebe presija duni rede atu nune’e bele asesu informasaun tantu husi ne’ebe deit.
“ durante ne’e iha ami nia aldeia ne’e rasik, ladun iha rede telefone, satan aldeia sira seluk, tamba ne’e ho antenna ne’ebe hari’i dadauk ne’e bele ona fo rede diak ba ema hotu hodi asesu informasaun,” nia informa.
Tuir Shedylia de Almeida (Estudante), haktuir katak, durante ne’e nia parte nudar estudate iha area refere maibé atu tenta telefone ba nia familia no nia inan aman kiusta lahalimar, tamba ne’e ho antenna ida ne’e bele ona fo rede ne’ebe diak atu nune’e sira bele kontaktu diak ho nia familia tomak iha nia rain rasik.
“ ami durante ne’e atu telefone mai uma araska la halimar, tamba rede laiha, tamba ne’e ho antenna ida ne’e bele ona fo rede diak ba ami nia fatin atu nune’e ami bele telefone baa mi nia familia,” nia aumenta.
Tamba ne’e ho prejensa antenna husi Timor Telekon ida ne’e, nia parte fo agradesimentu ba Kompania Telekomunikasaun ne’ebe atu loke rede to’o iha area rurais sira. Pri

Aldeia Soikili Hetan Eletrisidade

Posting Husi : Josefa Parada
.

LAUTEM-Planu Governu AMP nian ne’ebe determina katak iha tinan 2012 povú iha terotiriu tomak asesu ona ba Dezenvolvimentu inklui eletrisidade, ho ida ne’e dadauk ne’e iha teritoriu tomak komesa halaó ona hodi monta airin eletrisidade nian atú nune’e bele dada eletrisidadde ba sira ne’ebe sidauk bele asesu ahi eletrisidade.

Tamba ne’e, Observasaun STL iha terenu (Distritu Lautem-red) hato’o katak, kuaze iha fatin hotu-hotu iha Distritu Lautem nia laran, komesa husi Aldeia, Suco, Sub-Distritu to’o Distritu hetan hotu oportunidade atú nune’e bele dada eletrisidade tuir planu ne’ebe iha.
Maibé uniku iha Aldeia ida ne’ebe hanaran Aldiea Soikili, husi Suco Parlamentu, nian primeira Vez hetan oportunidade husi Governu ida ne’e ne’ebe dada eletrisidade to’o Aldeia refere.
Tamba ne’e mayoria Komunidade iha Aldeia ne’eba husu agradesimentu ba oportunidade ne’ebe Governu fo tantu laos fo buat barak maibé pelumenus responde ona nesesidade balun ne’ebe durante ne’e Komunidade infrenta.
Xefe Aldeia Soikili, Americo Aranda ba STL iha nia fatin foin lalais ne’e hateten katak, lori povú nia naran hakarak fo agradesimentu bo’ot teb-tebes ba Governu ne’ebe lidera husi Primeiru Ministru Cairala Xanana Gusmau, tamba pela premeira vez Governu ida ne’e dada sira nia eletrisidade ne’ebe durante bapa nia tempo to’o agora mak foin dada sira nian eletrisidade.
“ Ida ne’e primeira vez ami hetan oportunidade iha eletrisidade ne’ebe tuir planu atú dada mai, tamba uluk iha tempo bapa niab to’o agora maibé eletrisidade foin mak tama iha aldeia ida ne’e,” nia hateten.
Iha fatin ida ne’e mós, Roufino Fernandes, hateten katak eletrisidade ne’e importante ba komunidade iha fatin hotu-hotu, tamba ne’e prezensa planu husi governu nian ne’ebe dada eletrisidade ba area rurais sira ne’e nia parte fo agradesimentu ba Governu ne’ebe iha interese atú nune’e bele fo benesifiu ba povú liu husi ahi eletrisidade ida ne’e.
Tamba tuir nia ho eletrisidade ida ne’e sira rasik bele halo buat ruma ona ba sira nia an rasik maske sira hela iha area rurais ne’ebe dok husi capital Distritu no Capital Dili nian.
Armando Dias Quintas, ( Comunidade Aldeia Soikili) heten katak nia parte sente kontente wainhira eletrisidade atú tama sira nia aldeia, tamba tuir nia foin pela primeira vez sira hetan ahi eletrisidade wainhira atú dada ba sira nia aldeia refere.
Iha fatin ketak, Xefe Suku Parlamentu, Angelo Galvao Silva, iha nia intervensaun hateten katak, Aldeia Soikili ne’e serve duni atú nune’e bele hetan interese husi governu liu-liu mós Ahi eletrisidade ne’e, tamba sira durante ne’e foin pela primeira vez hetan ahi eletrisidade komesa husiu Indonesia nia tempo to’o agora.
Tamba ne’e nudar Xefi Suco iha Parlamentu nia laran, nia parte lori komunidade hotu hodi agradese ba Governu ne’ebe oras ne’e halaó ona planu atú nune’e povú bele sente dezenvolvimentu ne’e oinsa.
“ ita hare sira foin premeira vez hetan eletrisidade komesa husi Indonesia nia tempo to’o agora, tamba ne’e lori povú nia naran hau hato’o agradesimentu no obrigadu barak ba Governu ida ne’e,” nia hakuir. Tuir nia, la fasil atú atende povú iha tempo badak nia laran, maibé espera katak Governu bele halo dezenvolvimentu maske ho neneik maibé bele realize programa balun ne’ebe nesesariu ho komunidade nia moris. pri