GOVERNU LANSA PORTAL TRANSPARENSIA

Xanana Kongratula MF, Horta Husu Loke Internet Kafetaria Iha Dist

JOSEFA PARADA – SUARA TIMOR LOROSAE – 15 marsu 2011

DILI - Ministeriu Finansas (MF), lansa portal transparensia governu, ho objektivu fo sai orsamentu estadu nebe maka durante ne’e iha deit tesoreira, maibe ho portal ne’e ema hotu bele asesu ba orsamentu nomos ninia ezekusaun.

Ministra Finansas (MF) Emilia pires, hafoin lansamentu Portal Transparensia ba jornalista sira hateten, portal ne’e importante tebes, tamba transparensia nomos kontein dadus hotu nebe dala barak sai preokupasaun Parlamentu Nasional (PN), sosidade sivil nomos ema barak nian.

“ Portal importante tebes tamba transparensia, konten dadus hotu nebe normalmente PN husu, sosiadade sivil husu, dadus nebe ami rasik dala barak la hetan, persija tempu barak atu konstrui dadus atu hetan agora finalmenete ami hetan duni,” dehan MF Emilia hafoin lansamentu portal transparensia ba jornalista sira, iha Dili Convention Center, eis Merkadu Lama, Tersa (15/3).

Nia hatutuan, ho portal ne’e sei fo sai dadus orsamentu husi Minsiteriu sira, ezekusaun husi orsamentu, hafoin bele halo analizasaun rasik konaba ezekusaun ba orsamentu husi ministeriu sira.

Lansamentu portal Transparensia, hetan reasaun positivu husi Primeiru Minsitru (PM) Kay Rala Xanana Gusmão. Iha ninia deskursu PM Xanana Kongratula Ministeriu Finansas, nebe esforsu makas atu realize programa ne’e.

“ hau nia kongratula ba Ministeriu Finansas, ba esforsu nebe sira halo atu lansa portal ne’e, ne’e hanesan pasu ida diak tebes,” tenik PM Xanana.

Nune’e Prezidenti Republika (PR) Jose Ramos Horta, nebe marka mos prezensa iha lansamentu ne’e, sujere ba governu atu loke Internet kafetaria iha distritu sira, atu nune’e ema hotu iha Distritu bele akompanha transparensia orsamentu estadu nian.

“ hau hanoin portal ne’e importante I kapas tebes, maibe se karik bele hanoin to’ok loke mos internet kafetaria iha distritu sira, atu nune’e komunidade sira iha distritu mos bele akompanha,” dehan PR Horta.

Alende loke internet Kafetaria iha Distritu sira, PR Horta mos husu atu hatu’un presu Internet, tamba tuir nia hare folin internet karun tebes, maske nune’e PR Horta rasik iha tiha ona Internet gratuita iha Jardim Palasiu Prezidenti, nebe sempre nakonu ho jovem sira. Internet ne’e loke durante oras 24. Josefa Parada