Povu Agrikultor Tenke Han Aihan Rasik, Labele Depende Fos MTCI

Josefa Parada - Segunda, 14 Marsu 2011 - SUARA TIMOR LOROSAEDILI- Ministru Agrikultura no Peskas (MAP) Mariano Assanami Sabino Lopes fo mensajem ba povu agrikultor sira iha Timor Leste katak tenki han produtu local rasik hanesan batar, haree no sel-seluk tan, labele depende ba fos marka MTCI.“Ita nia rai ne’e bokur, traktor fahe dadauk ona, mekanisasi lao dadauk ona, fila rai gratuitu, ita labele tane liman ba hahan husi rai seluk,” dehan Ministru Assanami ba STL iha Kaikoli, Dili, foin lalais ne’e.

Ministru Mariano Assanami mos apela ba povu agrikultura iha nasaun foun ne’e para han aihan rasik. Tanba ne’e, povu agrikultur sira tenki servisu badinas. “Tinan-tinan ita produs batar no haree liu ona 100 resin mill toneladas. Iha 2010 konsege hasae batar 138 mill toneladas no haree to’o 111 mill toneladas. Ida ne’e Timor oan hotu-hotu han mos to’o hela. Maibe, ita nia ema lakoi han ninia produtu rasik, sira gosta mak konsumsi aihanhusi rai liur,” katak Mariano.

Tuir nia, uluk beila sira moris ho produtu local to’o hetan ukun rasik an. Maibe, agora ema depende ba fos MTCI. “ Ita iha makina dulas hare’e no batar. Ne’eduni esforsu servisu maka’as hodi hetan produsaun ne’ebe bele responde nesidade loron–loron,” tenik Mariano.

Iha parte seluk, Filipe Mendes Pereira, Asiste Dekanu Ekonomi Universidade Nasional Timor Lorosae (UNTL) husu ba governu atu tau atensaun ba povu agrikultura nia produsaun. Ne’eduni agrikultor sira rasik para oinsa mak hamenus kiak, atu oinsa liberta povu ne’e husi kiak no mukit tenke liu duni husi maneira ida ne’ebe mak povu hotu bele halo mak sai agrikultor. Atu oinsa mak rai bokur ida ne’e fila hodi hetan produsaun diak bele responde nesicidade uma laran.

Joao Fernandes hatete, povu agrikultura servisu maka’as maibe importante tenki governu ajuda traktor bele fila rai hodi hasae produsaun bele han, tanba fos governu fo subsidi laiha maibe fos marka globus iha maibe folin sae maka’as 25kg $18, nomos 30 kg folin $20, ne’eduni labele sosa.

Entertantu Martins da costa nudar estudante UNTL Fakuldade Agrikultura hatete, fos marka MTCI agora governu fo subsidi laiha ona iha loja tanba povu halerik fos maibe importante mak governu liu husi MAP tulun povu bele hasae produsaun no bele konsumsi produtu local rasik. Jef