Inkontru Konsultativu Administrador, PDD Atinji 100%

Josefa Parada - Sesta, 18 Marsu 2011 - SUARA TIMOR LOROSAE

DILI-Ministeriu Administrasaun Estatal Ordenamentu Teritoriu (MAEOT), realiza konsultsaun ho Administrador Distritu, atu halo avaliasaun ba programa sira nebe husi ministeriu ne’e halao durante fulan 3.Ministru MAEOT Arcangelho Leite, hafoin konsultasaun ne’e, ba jornalista sira hateten, inkontru ne’e hanesan inkontru ba dala uluk, nebe ministeriu estatal halao, atu tau hamutuk ideia hodi buka solusaun ba problema sira nebe husi nivel distritu, sub distritu, no suku sira hasoru.

“ Inkontru sira ne’e atu halo avaliasaun, servisu durante fulan 3, aprejenta problema sira nebe durante ne’e sira hasoru iha karaik, I oinsa buka rekolia idea para buka solusaun ba problema sira nebe nivel distritu, sub-distritu nomos iha suku hasoru,” dehan MAEOT Arcangelho ba jornalista sira, iha salaun inkontru STAE, Kaikoli, Dili, Sesta (18/3).

Nia hatutan, inkontru ne’e laos atu mai hato’o lamentasoens ka aprejenta problema, maibe aprejenta esforsu saida maka Administrador Distritu, Sub-Distritu nomos Suku sira halo atu rezolve problema nebe iha.

Nune’e Administrador Distritu Bobonaro, Dominggos Martins, iha ninia aprejentasaun informa projetu sira nebe tama iha distritu no sub-distritu Bobonaro kuaze remata hotu ona. Maibe problema nebe sira hasoru maka, oinsa ho pagamentu 90%, nebe husi Ministeriu relevante seidauk selu.

“ Projetu hirak ne’e besik 100% hotu ona, PDD kuaze 100% hotu ona, I hau hakarak husu deit, tamba ne’e mos sai preokupasaun ami nian, bainhira maka pagamentu 90%,” dehan Dominggos.

Kestaun hanesan mos hato’o husi Administrador Distritu Ermera, Victor dos Santos. Tuir Victor projetu PDD no PDL iha distritu Ermera remata hotu ona, maibe difikuldade nebe sira hasoru maka estrada nebe hadia la to’o fulan sempre a’at fila fali.

Preokupasaun nebe komunidade sira lamenta maka kondisaun Estrada nebe seidauk bele responde tuir sira nia hakarak. Sei iha area rural balun maka seidauk asesu ba Estrada nebe diak, ho kondisaun ne’e maka impede sira atu halao negosiu.

Konsultasaun ho administrador ba dala uluk ne’e, abertura husi Ministru Estatal Arcangelho Leite, akompanha husi Sekretariu Estadu Reforma Administrativu, Florindo Pereira, Sekretariu Tekniku Administrasaun Eleitoral, Tomas Cabral, partisipa husi Diretores Nasionais no Xefi Departementu sira. Josefa Parada