Husi: Jose da Costa
Dr. Mari Alkatiri halo deklararaun ida iha Dili, iha loron 15 Fulan Marsu 2011, liu husi Komunikadu ba Imprensa nebe foka liu konaba kasu Jose Luis Guterres nian nebe agora dadaun iha hela prosesu nia laran iha Tribunal Distrital Dili. Dr. Mari kestiona konaba konsiensia ulun bo'ot Governo AMP nian hodi dehan katak Justisa iha Timor Leste hanesan tempu kolonialismo, (maski Dr. Alkatiri la konsege hateke ba nia a'an katak nia rasik iha konsiensia ka la'e atu aseita se saida mak nia no nia elementu sira halo ne'e nudar persegisauan politika. Bele mos dehan tamba figur Jose Luis Guterres nian sai ameansa ba Mari atu atinji nia mehi atu sai Presidente da Republika iha 2012). Saida mak Dr. Alkatiri koloka iha ne'e mak dehan Primeiro Ministro buka defende a'an no defende nia membro sira nebe hasoru dadaun Justisa. Liu tan Mari dehan kostuma Xanana nian mak disrespeita Tribunal, disrespeita instituisaun estadu nian nebe independente no orgaun soberania seluk nebe persiza hetan respeito husi xefe governo. Los duni, katak orgaun judisiariu hanesan tribunal ka ministeriu publiko ne'e neutro no independente iha nia funsaun no natureza, maibe buat nebe iha mak nudar Procuradora Geral da republiko nebe sai mos hanesan arkitetura ba iha kasu ida ne'e mak ita kestiona. Hau labele imagina se Sr. Jose Luis Guterres hariku a'an ho osan, $ 30.000 kompara ho osan estadu ka povo nian nebe Kamarada Mari simu ho base iha LPV no osan viagem sira seluk nebe Mari uja hodi representa Timor Leste iha rai liur maibe depois ba fase fali ropa foer Timor nian iha liur. Hau lahatene se Mari iha konsiensia atu hanoin to'o iha neba ka la'e. Hau kompriende katak osan nebe Mari simu tamba LPV ne'e dehan tuir lei nebe Fretilin rasik mak elabora no halo diskusaun iha Governo Fretilin nia periodo. Maibe husik tiha issue konaba Jose Luis Guterres nian hodi hein wainhira Jose Luis simu ona kna'ar nudar VPM mak foin halo prosesu. Iha buat rua mak bele halo ita kompriende. Se fose Sr. Jose Luis mak la sai karik VPM, probelema ne'e ladauk mosu, no se fose Sr. Jose Luis mak lai sai husi Fretilin karik sira kala taka deit ona, tamba hanesan deit, ita julga fali ita nia membro rasik. Maibe situasaun sai oin seluk ona wainhira Sr. Jose Luis hetan knaar hanesan VPM. Politiko sira nune'e mak lolos hetan titulu laiha konsiensia no piur liu tan falta de maturidade politika.
Hau hanoin labarik sira halimar iha liuron ne'e mak ita husu nia opiniaun ba kasu ne'e mos sira kala sei hatan, ne'e normal tamba jogo persegisaun nian. Sa tan povo sira nebe iha ona esperiensia iha governasaun Mari nian durante tinan 5. Sira mos hare hela drama saida mak agora lao hela. Imagina deit Mari dehan fali atu sai defensor ba Sr. Jose Luis Guterres nian iha Tribunal. Mari mak fo orientasaun ba nia elementus sira iha Parlamentu hodi foti tiha problema, no fo orientasaun hodi lori ba iha PDHJ to'o Procuradoria geral da Republika, ikus mai hakarak sai fali defensor. Ami sira nebe hobi nonton bola ne'e, ami bele halo balansu ida katak tetu ba tetu mai Jose Mourinho (Treinador Real Madrid) no Mari Alkatiri (Sekjen Fretilin) nia karakter la diferensa dook. Pelumenus interpreta tuir ami ki'ik nia hanoin dehan lider nebe kontraversial no la akomodativo. Jose Mourinho iha palku Futeboll nian iha Spanha, no Mari Alkatiri iha palku politika iha Timor Leste.
Oinsa ba mos nudar Timor oan, labele ses duni husi prosesu justisa. Hau lahare katak Sr. Primeiro Ministro lakohi kontribui ba justisa. Primeiro Ministro mos la tahan nia membro sira atu labele ba justisa. pelu kontrario, tamba hakarak atu ba justisa ne'e mak Sr. Primeiro Ministro husu Ministra Financa atu sai interina durante nia aujensia, nune'e Sr. Jose Luis Guterres ba hatan iha Tribunal. Sr. Jose Luis ba duni tuur iha sala tribunal nian, so que tribunal mak deklara dehan adia tiha julgamentu ne'e. Hau hanoin kolabora mak hanesan nee ona, laos husu atu resigna a'an. Se Dr. Mari kompara nia situasaun iha 2006 ho situasaun Sr. Jose Luis Guterres nian agora, hodi ejiji resignasaun ne'e buat rua ke la hanesan no hanesan fali halo komparasaun entre Lalehan ho Rai. Dr. Mari hatene hela buat ne'e, maibe tamba politika ne'e mak nia hakarak kontinua avansa ho deklarasaun oin-oin para desvia tiha atensaun publiko nian.
Hakerek nain nudar Vendedor Ikan iha tasi ibun Lecidere Dili.
Tidak ada komentar:
Posting Komentar