PARTIDU HOTU IHA POTENSIA UKUN, LAOS FRETILIN DEIT

MIRO NASCIMENTO – SUARA TIMOR LOROSAE – 22 marsu 2011

DILI - Partidu hotu iha vantajen (potensia, red) no direitu atu ukun iha tinan 2012, reflete ba vontade popular sira. Ba povu presiza desenvolvimentu ne´ebe lao hodi lori progresu no ninia impaktu moris diak ba Nasaun.
Liafuan hirak ne’e hato’o husi Deputadu CNRT Natalino dos Santos ba STL foin lalais nee. Tuir Natalino, povu hakarak dezenvolvimentu ne´ebe lao no dezenvolvimentu laos ho tsunami.

Tanba tsunami iha signifikasaun oin oin, bele signifika ameasa, tanba uluk kedas Fretilin sempre ho slogan ida katak kuandu manan sei dasa mos sidade.

Natalino hatutan, se maka ukun tenki ho laran mos no domin, tamba sira ne´ebe maka tau iha ulun mak odiu no vingansa, povu sei la fiar atu kaer tan ukun. “Vingansa no odiu maka hasai liafuan sira be dehan sira ukun sei lori tsunami ba desenvolvimentu 2012,” argumenta Natalino dos Santos.

Iha fatin seluk Deputadu PD Rui Meneses dehan dezenvolvimentu iha 2012 lao ba oin buka evita tsunami, tamba konsekuensia maka lori desastres naturais ne´ebe ninia impaktu ladiak ba povu, povu oras nee hakmatek ona lalika uza termus ne’ebe hatauk povu.

Tuir Rui katak ho politiku ne´ebe maka dehan tsunami iha 2012, ne´e hatudu katak politiku ne´ebe ladun hanoin diak ba rai ida ne´e.

Deputadu nain rua nee hamosu deklarasaun nee hodi responde ba deklarasaun Sekretariu Jeral Partidu Fretilin, Mari Alkatiri ne’ebe hateten katak “Iha 2012 Fretilin sei halo tsunami desenvolvimentu”.

Iha tinan 2002 mos Mari Alkatiri hasai lian katak Fretilin ukun, sei dasa rai mos! */lio